पुणे : शहरातील हडपसर आणि वानवडी परिसरात मटका जुगार अड्डे राजरोसपणे सुरू आहेत. परंतु स्थानिक पोलिस ठाण्यांकडून त्याकडे दुर्लक्ष होत असल्याचे समोर आले आहे. दरम्यान, गुन्हे शाखेने हडपसर आणि वानवडी परिसरात गेल्या दोन दिवसांत जुगार अड्ड्यांवर छापे टाकून ५१ जणांना ताब्यात घेतले आहे.

हडपसर येथील गोसावी वस्ती आणि वानवडी येथील सातवनगर परिसरात मटका आणि जुगार अड्डे सुरू आहेत. याबाबत नागरिकांकडून तक्रारी येत होत्या. तरीही या भागात मटका जुगार अड्डे सुरूच होते. दरम्यान, गुन्हे शाखेच्या सामाजिक सुरक्षा विभागाला या जुगार अड्ड्यांबाबत माहिती मिळाली.

त्यानुसार गुन्हे शाखेचे पोलिस उपायुक्त अमोल झेंडे यांच्या मार्गदर्शनाखाली सामाजिक सुरक्षा विभागाचे वरिष्ठ पोलिस निरीक्षक भरत जाधव यांच्या पथकाने सोमवारी (ता. १०) या जुगार अड्ड्यांवर छापे टाकले. या कारवाईत २८ हजारांची रोकड आणि मोबाइलसह सुमारे दीड लाखांचा मुद्देमाल जप्त केला आहे. या प्रकरणी हडपसर आणि वानवडी पोलिस ठाण्यात २७ जणांविरुद्ध गुन्हा दाखल केला आहे.

तसेच, सामाजिक सुरक्षा विभागाच्या पथकाने पुन्हा मंगळवारी हडपसर येथील मांजरी परिसरात जुगार अड्ड्यावर छापा टाकला. या कारवाईत पोलिसांनी ३४ जणांना ताब्यात घेतले आहे. वरिष्ठ पोलिस निरीक्षक भरत जाधव, सहायक निरीक्षक अश्विनी पाटील, अनिकेत पोटे, पोलिस अंमलदार बाबा कर्पे, अजय राणे, तुषार भिवरकर, इरफान पठाण, हणमंत कांबळे, इम्रान नदाफ, संदीप कोळगे, अमित जमदाडे, किशोर भुजबळ यांच्या पथकाने ही कारवाई केली.