Latest Pune News भांडणे सोडविण्यात मध्यस्थी करणाऱ्या सहायक पोलिस निरीक्षकावर सराईत गुन्हेगारांनी हल्ला केल्याची धक्कादायक घटना हडपसर भागात घडली. आरोपींनी निरीक्षकाला कोयता फेकून मारल्याने त्यांच्या डोक्याला गंभीर दुखापत झाली आहे.

या प्रकरणी निहालसिंग मन्नूसिंग टाक (वय १८, रा. तुळजाभवानी वसाहत, हडपसर) आणि राहुलसिंग ऊर्फ राहुल्या रवींद्रसिंग भोंड (वय १९, रा. हडपसर) यांच्यावर गुन्हा दाखल करण्यात आला आहे.

आरोपींनी केलेल्या हल्ल्यात सहायक निरीक्षक रत्नदीप गायकवाड जखमी झाले आहेत. त्यांच्यावर रुग्णालयात उपचार सुरू असल्याची माहिती परिमंडळ पाचचे पोलिस उपायुक्त आर. राजा यांनी दिली. हडपसर भागातील ससाणेनगर परिसरात रविवारी (ता. २५) दुपारी चारच्या सुमारास हा प्रकार घडला. घटनेच्या ठिकाणी दोन दुचाकीस्वारांमध्ये वाद सुरू होता.

त्यावेळी एका दुचाकीस्वाराच्या बाजूने आरोपी निहालसिंग आणि राहुलसिंग भांडणे करत होते. आरोपींच्या हातात कोयता होता. त्यावेळी तेथून निघालेल्या गायकवाड यांनी आरोपींना पाहिले. गायकवाड यांनी तेथे धाव घेत भांडणे सोडविण्याचा प्रयत्न केला. तसेच आरोपी निहालसिंग टाक याच्या हातातील कोयता काढून घेण्याचा प्रयत्न गायकवाड यांनी केला.

झटापटीत टाकने कोयता फेकून मारल्याने गायकवाड यांच्या कपाळाला गंभीर दुखापत झाली. आरोपी टाक आणि साथीदार भोंड पसार झाले. या घटनेची माहिती मिळताच पोलिस उपायुक्त राजा यांनी घटनास्थळी भेट दिली. पसार झालेल्या आरोपींचा शोध घेण्यात येत आहे. आरोपी भोंड आणि टाक यांच्याविरुद्ध खुनाचा प्रयत्न, घरफोडी, चोरी, दंगा करणे असे गंभीर स्वरूपाचे गुन्हे दाखल आहेत.