किरकटवाडी : सिंहगड रस्त्यावरील नांदेड गावातून एका चौदा वर्षीय अल्पवयीन मुलीचे अज्ञाताने अपहरण केल्याची धक्कादायक घटना घडली आहे. मुलीच्या भावाने याबाबत फिर्याद दिली असून त्यानुसार अज्ञाताविरोधात हवेली पोलीस ठाण्यात गुन्हा दाखल करण्यात आला आहे.

मुलीचे अपहरण नेमके कोणी व कोणत्या कारणास्तव केले याबाबत निश्चित माहिती नसली तरी कोणीतरी फूस लावून तिला पळवून नेले असावे असे तक्रारीत नमूद करण्यात आले आहे.

मूळची उत्तरप्रदेशच्या गाझीपूर येथे राहत असलेली अल्पवयीन मुलगी सिंहगड रस्त्यावरील नांदेडगाव येथे भावाकडे राहण्यास आली होती.

भाऊ कामानिमित्त सोलापूर येथे गेल्यानंतर ती घरी एकटीच होती. भाऊ सोलापूर येथून परत आल्यानंतर बहीण घरी नव्हती. त्याने आजूबाजूला मित्र व ओळखीच्या लोकांकडे चौकशी केली परंतु ती आढळून आली नाही.

बहीणीचा कोठेच शोध लागत नसल्याने तिला कोणीतरी अज्ञाताने फूस लावून पळवून नेले असावे अशी शंका भावाला आली.

हवेली पोलीस ठाण्यात जाऊन त्याने याबाबत सविस्तर माहिती दिल्यानंतर त्यानुसार अज्ञाताच्या विरोधात अपहरणाचा गुन्हा दाखल करण्यात आला आहे. प्रभारी अधिकारी आयपीएस अनमोल मित्तल यांच्या मार्गदर्शनाखाली पोलीस उपनिरीक्षक दिलीप शिंदे याबाबत अधिक तपास करत आहेत.