पुणे : वारजे माळवाडी परिसरात दहशत माजविणाऱ्या आणखी एका टोळीतील सराईत गुन्हेगार कार्तिक संजय इंगवले आणि त्याच्या इतर तीन साथीदारांच्याविरोधात मोका कायद्यांतर्गत कारवाई केली आहे.

पोलिस आयुक्त रितेश कुमार यांनी गुन्हेगारी टोळ्यांवर जरब बसविण्यास सुरवात केली असून, त्यांनी मोकांतर्गत केलेली ही सहावी कारवाई आहे. इंगवले याने तीन साथीदारांसोबत मिळून वारजे माळवाडीमध्ये एकावर गोळीबार करून दहशत निर्माण केली होती. याप्रकरणी वारजे पोलिस ठाण्यात गुन्हा दाखल करण्यात आला होता.

पोलिसांनी आरोपी कार्तिक संजय इंगवले (वय २० वर्षे, रा. पिठाच्या गिरणीजवळ, रामनगर, वारजे), सनी बाळू शिंदे (वय २१) आणि वैभव दत्तात्रेय भाग्यवंत (वय २४, दोघे रा. बापूजी बुवा चौक, रामनगर, वारजे) या तिघांना अटक केली आहे. ते सध्या येरवडा कारागृहात आहेत. तर, एका अल्पवयीन मुलाला बालसुधारगृहात ठेवण्यात आले आहे.

आरोपी कार्तिक इंगवले हा टोळी प्रमुख असून, त्याने स्वतःची टोळी तयार करून गुन्हे केले आहेत. त्यांच्यावर जबरी चोरी, खंडणी, जीवे मारण्याचा प्रयत्न, नागरिकांच्या मालमत्तेचे नुकसान, तोडफोड, बेकायदेशीर पिस्तूल बाळगणे,

नागरिकांच्या मनात दहशत पसरविणे असे गंभीर स्वरूपाचे गुन्हे दाखल आहेत. पोलिस आयुक्त रितेश कुमार यांनी गुन्हेगारांच्या हालचालींवर बारकाईने लक्ष देऊन कठोर कारवाई करण्याचे आदेश सर्व वरिष्ठ पोलिस अधिकारी आणि पोलिस ठाण्यांच्या निरीक्षकांना दिले आहेत.