पुणे : तरुणाचा खुन करुन पसार झालेल्या आरोपीस बिबवेवाडी पोलिसांनी एक तासातच बेड्या ठोकल्या. हि घटना सोमवारी दुपारी दिड वाजण्याच्या सुमारास बिबवेवाडी येथे घडली होती. किरकोळ कारणावरुन झालेल्या भांडणाच्या रागातुन खुन (Murder) झाल्याची कबुली आरोपीने दिली. (Pune Crime News)

विशाल ओव्हाळ (वय 26, रा. पद्मावती वसाहत) असे खुन झालेल्या तरुणाचे नाव आहे. तर शिवदत्त उर्फ दत्तात्रय चंद्रकांत सकट (वय 34, रा. अपर ओटा, बिबवेवाडी) असे अटक केलेल्या आरोपीचे नाव आहे. याप्रकरणी गणेश विठ्ठल ओव्हाळ (वकय 46) यांनी बिबवेवाडी पोलिस ठाण्यात फिर्याद दिली होती.

विशाल ओव्हाळ या तरुणावर सोमवारी दुपारी दिड वाजण्याच्या सुमारास महेश सोसायटी येथील राजीव गांधी राजीव गांधी कॉम्प्लेक्‍सच्या पाठीमागील बाजुस अज्ञात व्यक्तीने दगडाने ठेचून खुन केल्याबाबतची खबर बिबवेवाडी पोलिसांना मिळाली होती. त्यानुसार, पोलिस घटनास्थळी दाखल झाल्यानंतर संबंधित तरुण रक्ताच्या थारोळ्यात पडल्याने पोलिसांनी त्यास उपचारांसाठी तत्काळ ससून रुग्णालयात दाखल केले. मात्र त्याचा उपचारांपुर्वीच मृत्यु झाला.

दरम्यान, बिबवेवाडी पोलिसांकडून या प्रकरणाचा शोध घेतला जात होता. मयत विशाल ओव्हाळ हा मोबाईल वापरत नसल्याने पोलिसांना तपासामध्ये अडचण येत होती. पोलिस व विशालचे नातेवाईक आरोपीचा शोध घेत असतानाच, संबंधित गुन्हा शिवदत्त सकट याने केला असून तो सोलापुर जिल्ह्यातील माढा या त्याच्या गावी पळून जाण्यासाठी निघाला असल्याची खबर पोलिसांना मिळाली.

त्यानुसार, पोलिसांनी त्यास सापळा रचून अटक केली. पोलिसांनी त्याची सखोल चौकशी केल्यानंतर त्याने विशाल ओव्हाळचा खुन केल्याची कबुली दिली. आरोपी व विशालची सोमवारी सकाळी किरकोळ भांडणे झाली होती. त्या रागातुन आरोपीने त्याचा दगडाने ठेचून खुन केल्याची माहिती पोलिसांना दिली. हि कारवाई वरिष्ठ पोलिस निरीक्षक सुनील झावरे, पोलिस निरीक्षक (गुन्हे) अनिता हिवरकर, सहाय्यक पोलिस निरीक्षक प्रवीण काळुखे, पोलिस कर्मचारी संतोष पाटील, शाम लोहमकर, गणेश दुधाने, दैवत शेडगे, शिवाजी येवले यांच्या पथकाने हि कारवाई केली.