पुणे - श्रीमंत दगडूशेठ हलवाई गणपती हा यंदाच्या गणेशोत्सवात विसर्जन मिरवणुकीच्या पहिल्याच दिवशी दुपारी ४ वाजता मिरवणुकीत सहभागी होणार असल्याचे दगडूशेठ हलवाई गणपती सार्वजनिक गणपती ट्रस्टचे अध्यक्ष माणिक चव्हाण यांनी बुधवारी (ता. २३) पत्रकार परिषदेत बोलताना सांगितले.

या ट्रस्टच्या वतीने पुणे शहरातील विविध गणेश मंडळांना दिल्या जाणाऱ्या विविध पुरस्कारांची घोषणा करण्यासाठी आज पत्रकार परिषद आयोजित करण्यात आली होती. यावेळी बोलताना चव्हाण यांनी ही घोषणा केली.

चव्हाण पुढे म्हणाले, "मागील अनेक वर्षे दगडूशेठ गणपतीची विसर्जन मिरवणूक परंपरेप्रमाणे मिरवणुकीच्या दुसऱ्या दिवशी पहाटे निघत असे. यामुळे अनंत चतुर्दशीच्या दिवशी गणपतीचे विसर्जन होत नाही. यासाठी यंदापासून हा बदल करण्यात आला आहे.

लक्ष्मी रस्त्यावरून ही मिरवणूक निघत असे. परंतु, गणपती निघण्यास होणारा उशीर खूपच वाढत चालला आहे.

मागील वर्षी दुसऱ्या दिवशी सकाळी ७.४५ वाजता बेलबाग चौकात गणपतीचे आगमन झाले होते. यामुळे भाविकांना दर्शनासाठी खूप ताटकळत रहावे लागले होते. हे टाळण्यासाठी आणि भाविकांच्या भावनांचा विचार करून हा बदल करण्यात आला आहे."