पुणे : महाराष्ट्र लोकसेवा आयोगातर्फे (MPSC) तीन महिन्यांपूर्वी ‘गट-ब’साठी संयुक्त पूर्व परीक्षा घेण्यात आली. या परीक्षेच्या उत्तरतालिकेतील काही चुकांवर उमेदवारांनी आक्षेप घेतला. मात्र, सुधारित उत्तर देण्याऐवजी एमपीएससीने संबंधित प्रश्नच थेट रद्द केल्याने अनेक उमेदवारांना ०.२५ गुणांनी अनुत्तीर्ण व्हावे लागले. अखेर न्याय मिळविण्यासाठी या उमेदवारांनी न्यायालयात याचिका (court petition) दाखल केली असून त्यावर २० व २३ डिसेंबरला सुनावणी(hearing) होणार आहे, अशी माहिती सूरज पवार या विद्यार्थ्याने दिली.

एमपीएससीने(mpsc) पोलिस उपनिरीक्षक, विक्रीकर निरीक्षक, सहायक कक्ष अधिकारी, या पदांसाठी राज्य दुय्यम सेवा गट-ब संयुक्त पूर्व परीक्षा ४ सप्टेंबर २०२१ रोजी घेतली. या परीक्षेच्या उत्तरतालिकेतील चुकीच्या उत्तरांवर उमेदवारांनी पुराव्यांसह आक्षेप घेतले होते. मात्र, दुसऱ्याही उत्तरपत्रिकेत अनेक चुका असल्याने एमपीएससीने तिसरी उत्तरतालिका पहिल्यांदाच लावली. त्यामध्ये अचूक उत्तर देण्याऐवजी उत्तरांमध्ये झालेली चूक लपविण्यासाठी एसपीएससीने या प्रश्नांच्या उत्तरांमध्ये बदल न करता ते प्रश्नच थेट रद्द केले. एमपीएससीच्या या चुकीच्या निर्णयाचा फटका उमेदवारांना बसला असून याविरोधात न्यायालयात याचिका दाखल केल्याचे सोमनाथ चव्हाण या उमेदवाराने सांगितले.

उत्तरतालिका जाहीर करण्याची प्रक्रिया

एमपीएससीकडून परीक्षेनंतर पहिली उत्तरतालिका जाहीर केली जाते. यातील उत्तरांवर आक्षेप असतील, तर ते नोंदविण्यासाठी ४० दिवसांचा कालावधी दिला जातो. त्यानंतर आलेल्या आक्षेपांची तज्ज्ञांकडून तपासणी करून एमपीएससी त्यात बदल करते. काही सुधारणा असतील, तर दुसरी सुधारित उत्तरतालिका जाहीर करून अंतिम निकाल जाहीर केला जातो.

या प्रश्नांवर आक्षेप

उत्तरतालिकेतील प्रश्नपत्रिका कोड ‘अ’मधील प्रश्न क्रमांक २७ बद्दल आक्षेप घेतला होता. यामध्ये चार विधाने दिली होती. ‘ड’ पर्यायात ‘गौताळा राष्ट्रीय उद्यान जळगाव जिल्ह्यात आहे’ असे विधान आहे. हे चूक असून पुस्तकातील संदर्भानुसार ‘गौताळा राष्ट्रीय उद्यान नसून ते अभयारण्य आहे. असे एमपीएससीला कळविले होते. मात्र, आक्षेपानंतर या प्रश्नाच्या उत्तरामध्ये सुधारणा न करता तो थेट रद्द करण्यात आला. असाच गोंधळ प्रश्न क्रमांक १७ मध्येही झाला असल्याचे उमेदवारांचे म्हणणे आहे.