पुणे : पुणे जिल्ह्यात (Pune District) मागील तीन दिवसांपासून सातत्याने वाढत असलेली दिवसातील नवीन कोरोना रुग्णांची (Corona Patient) संख्या सोमवारी (ता.२७) कमी झाली आहे. सोमवारी दिवसात जिल्ह्यात १५८ नवे कोरोना रुग्ण आढळून आले आहेत. हीच संख्या मागील तीन दिवसांपासून सातत्याने अडीचशेहून अधिक झाली होती. जिल्ह्यातील दिवसातील एकूण नवीन रुग्णांमध्ये पुणे शहरातील ८० रुग्णांचा समावेश आहे. (Pune District Corona Updates)

दरम्यान, सोमवारी दिवसातील कोरोनामुक्त रुग्णांच्या संख्येतही वाढ झाली आहे. जिल्ह्यात दिवसात १८३ जण कोरोनामुक्त झाले आहेत. अन्य एका रुग्णांचा कोरोनाने मृत्यू झाला आहे. हा मृत्यू पिंपरी चिंचवडमधील आहे. दिवसात पुणे शहर, जिल्हा परिषद कार्यक्षेत्र, नगरपालिका आणि कॅंटोन्मेंट बोर्ड क्षेत्रात एकाही रुग्णाचा मृत्यू झाला नाही.

जिल्ह्यातील दिवसातील एकूण नवीन कोरोना रुग्णांमध्ये पुणे शहरातील ८० रुग्णांबरोबरच पिंपरी चिंचवडमधील ३८, जिल्हा परिषद कार्यक्षेत्रातील २७, नगरपालिका हद्दीतील ८ आणि कॅंटोन्मेंट बोर्ड क्षेत्रातील ५ रुग्णांचा समावेश आहे. दिवसभरात पुणे शहरातील सर्वाधिक ७१ जण कोरोनामुक्त झाले आहेत. पिंपरी चिंचवडमधील २५, जिल्हा परिषद कार्यक्षेत्रातील ७०, नगरपालिका हद्दीतील ११ आणि कॅंटोन्मेंट बोर्ड क्षेत्रातील सहा जण कोरोनामुक्त झाले आहेत.

सद्यःस्थितीत जिल्ह्यात एकूण १ हजार ९७९ सक्रिय कोरोना रुग्ण आहेत. यापैकी शहर व जिल्ह्यातील विविध रुग्णालयात ५६५ रुग्णांवर उपचार सुरू आहेत. उर्वरित १ हजार ४१४ हे गृहविलगीकरणात आहेत.