पुणे : शेतकऱ्यांना एकरकमी एफआरपी मिळण्यासाठी भारतीय किसान संघातर्फे शहरातील साखर आयुक्त कार्यालयासमोर गुरुवारी तीव्र आंदोलन करण्यात आले. उसाला चार हजार रुपये प्रतिटन भाव मिळावा, अशी मागणीही या वेळी करण्यात आली.

शेतकऱ्यांना तीन टप्प्यांमध्ये एफआरपी देण्याची शिफारस कृषिमूल्य आयोगाने केंद्र सरकारला केली आहे. राज्य सरकारनेही अशाच स्वरूपाची शिफारस केली आहे. मात्र, त्यामुळे शेतकरी आर्थिक दुष्टचक्रात अडकणार असल्याने एकरकमी एफआरपी द्यावे, असे निवेदन साखर आयुक्तांना किसान सभेतर्फे देण्यात आले. आजपर्यंत ज्या लोकांनी शेतकऱ्यांची आंदोलने केली त्यांनी राजकारणाचा मार्ग पत्करून लाभाची पदे पटकावली. त्यामुळे शेतकरी उघड्यावर पडले.

भारतीय किसान संघ अराजकीय संघटना असल्यामुळे हा प्रश्न कोणत्याही तडजोडीशिवाय सुटल्याशिवाय स्वस्थ बसणार नाही, असे संघाचे नेते चंदनराव पाटील यांनी सांगितले. तर किसान संघाचे राष्ट्रीय नेते मान साया रेड्डी यांनी साखर कारखान्यांचे अर्थशास्त्र उलगडून सांगितले. ॲड. माऊली तुपे, ॲड. सुभाष देशमुख, ॲड. रावसाहेब शहाणे, मदनराव देशपांडे, कपिला मुठे यांच्या नेतृत्वाखाली हे आंदोलन झाले.