पुणे : मेट्रोचा प्रवास आता केवळ ‘जॉय राइड’ न राहता तो पुणेकरांच्या दैनंदिनीचा भाग होत आहे. मेट्रोने प्रवास करणाऱ्या प्रवाशांच्या संख्येत दिवसेंदिवस वाढ होत आहे. मागील दोन दिवसांत तब्बल एक लाख ६५ हजार २५६ प्रवाशांनी मेट्रोने प्रवास केला. ही संख्या आत्तापर्यंतची सर्वाधिक ठरली आहे.

पंतप्रधान नरेंद्र मोदी यांच्या हस्ते मेट्रोच्या विस्तारित मार्गाचे एक ऑगस्टला उद्‍घाटन झाले. यात पिंपरी-चिंचवड महापालिका ते शिवाजीनगर न्यायालय आणि वनाज ते रूबी हॉल क्लिनिक या दोन मार्गांचा समावेश होता.

पहिल्या दिवशी सायंकाळी पाच वाजल्यापासून प्रवासीसेवेला सुरुवात झाली. पहिल्या दिवशी दोन्ही मार्गांवर १२ हजार ९१८ प्रवाशांनी प्रवास केला. त्यानंतर सहा ऑगस्टला प्रवाशांच्या संख्येत वाढ झाली. सहा ऑगस्टला दोन्ही मार्गांवर ९६ हजार ४९८ प्रवाशांनी प्रवास केला.

त्यानंतर १५ ऑगस्टला प्रवासीसंख्येने उच्चांक गाठला. १५ ऑगस्टला १ लाख २३ हजार ७२० प्रवाशांनी प्रवास केला. ही संख्या सर्वाधिक ठरली. १४ व १५ ऑगस्ट, या दोन दिवसांत दोन्ही मार्गांवर एक लाख ६५ हजार २५६ प्रवाशांनी प्रवास केला.

‘पीएमपी’चाही उच्चांक

१५ ऑगस्टला सार्वजनिक सुट्टी असल्याने ‘पीएमपी’ प्रशासनानेदेखील १७ मार्गांवर अतिरिक्त बस सोडल्या होत्या. १५ ऑगस्टला ‘पीएमपी’तून तब्बल साडेबारा लाख प्रवाशांनी प्रवास केला. यातून ‘पीएमपी’ला एका दिवसात एक कोटी ७७ लाख रुपयांचे उत्पन्न मिळाले. १५ ऑगस्टला सामान्यपणे १० ते ११ लाख प्रवासी प्रवास करतात.

या तांत्रिक अडचणी दूर व्हाव्यात

• शिवाजीनगर न्यायालय स्थानक हे भूमिगत स्थानक असल्याने येथे मोबाईलला रेंज मिळत नाही, त्यामुळे ‘यूपीआय’द्वारे तिकीट काढताना अडचणी येतात.

• तिकिटाची रक्कम अकाउंटमधून कापली जाते, मात्र प्रत्यक्षात तिकीट मिळत नाही. असेही प्रकार घडले आहेत.

• प्रवाशांना रकमेचा परतावा मिळविण्यासाठी ग्राहकसेवा क्रमांकाशी संपर्क साधून तक्रार नोंदवावी लागते.

• तसेच तिकीट स्कॅन करतानादेखील तांत्रिक अडचणी येत असल्याचा प्रवाशांचा अनुभव आहे.

प्रवाशांच्या मोबाईलला रेंज मिळत नसेल तर तो मोबाईल कंपन्यांच्या सेवेतील दोष आहे. आम्ही कंपन्यांना याबाबत कळविले आहे.

- हेमंत सोनवणे, महाव्यवस्थापक (जनसंपर्क), पुणे मेट्रो