पुणे : मेट्रोच्या प्रकल्पात काम करणाऱ्या एका सुरक्षारक्षकावर दोघांनी पूर्व वैमनस्यातून धारदार शस्त्राने वार केले. या घटनेत सुरक्षारक्षक गंभीर जखमी झाला आहे. हि घटना डेक्कन जिमखाना येथे शुक्रवारी रात्री पावणे बारा वाजता घडली. याप्रकरणी डेक्कन पोलिसांनी दोघांना अटक केली.

राेहीदास उभे (वय २६,रा. भुगाव, ता. मुळशी) असे जखमी झालेल्या सुरक्षारक्षकाचे नाव आहे. त्यांनीच डेक्कन पोलिस ठाण्यात फिर्याद दिली आहे. तर जितेश उर्फ प्रतीक रामचंद्र कदम (वय १८, रा. खिलारेवाडी, कर्वे रस्ता) , अभिषेक राजेंद्र उभे (वय १९, रा. सुतारदरा, कोथरूड) अशी अटक केलेल्याची नावे आहेत. तसेच एका अल्पवयीन मुलालाही पोलिसांनी ताब्यात घेतले आहे. पोलिसांनी दिलेल्या माहितीनुसार, फिर्यादी उभे हे एका खासगी कंपनीमार्फत डेक्कन येथील मेट्रोच्या कामावर सुरक्षारक्षक म्हणून काम करीत आहेत.

आरोपी व फिर्यादी हे एकमेकांना ओळखतात. त्यांची काही दिवसांपूर्वी आरोपींबरोबर भांडणे झाली होता. दरम्यान, शुक्रवारी रात्री पावणे बारा वाजता फिर्यादी हे डेक्कन येथील यशवंतराव चव्हाण पूलावर (झेड ब्रीज) उभे थांबले होते. त्यावेळी तेथे आलेल्या आरोपीनी उभे यांना शिवीगाळ, मारहाण करीत धारदार शस्त्राने वार केले. त्यामध्ये उभे गंभीर जखमी झाले. त्यानंतर त्यांना उपचारासाठी रुग्णालयात दाखल करण्यात आले.दरम्यान,आरोपीनी झेड ब्रीज परिसरात दहशत निर्माण करुन ते पसार झाले. याप्रकरणी फिर्याद दाखल झाल्यानंतर डेक्कन पोलिसांनी आरोपींना तत्काळ अटक केली. या प्रकरणाचा तपास सहाय्यक पोलिस निरीक्षक कांबळे करीत आहेत.