पुणे - शहरातील (Pune City) यशवंतराव चव्हाण नाट्यगृह, (Auditorium) अण्णाभाऊ साठे नाट्यगृह आदी नाट्यगृहांमधील प्रश्नांची दखल महापालिका (Municipal) प्रशासनाने घेतली आहे. या नाट्यगृहांमधील वातानुकूलीत यंत्रणा, ध्वनी व्यवस्था लवकरच पूर्ववत बसवण्यात येतील, अशी ग्वाही प्रशासनाने बुधवारी दिली.

बिबवेवाडी परिसरातील अण्णाभाऊ साठे नाट्यगृहातील ध्वनी वर्धक काही काळापूर्वी चोरीला गेले होते. त्या घटनेला चार महिने उलटल्यानंतरही पर्यायी ध्वनी वर्धक बसवण्यात आले नव्हते. तसच मध्यंतरीच्या काळात पुरवली जाणारी पर्यायी ध्वनी व्यवस्था अचानक बंद करण्यात आली व निर्मात्यांना स्वतःच्या खर्चाने सदर व्यवस्था करावी लागली. याबाबत ‘सकाळ’नेही वृत्त प्रकाशित केले होते. याची दखल घेत बुधवारी झालल्या बैठकीत अण्णाभाऊ साठे नाट्यगृहात ध्वनी व्यवस्था पूर्ववत होईपर्यंत नाट्यगृहाच्या भाड्यामध्ये प्रत्येक प्रयोगाला एक हजार रुपये सवलत देण्यात येणार असून महिन्याभरात ध्वनी व्यवस्था पूर्ववत करण्यात येईल, असे आश्वासन पालिकेने दिले. तसेच यशवंतराव चव्हाण नाट्यगृहातील वातानुकूलित यंत्रणा पूर्ववत बसवण्यासाठी दोन महिन्यांच्या आत निविदा प्रक्रिया करून कार्यवाही करण्यात येईल, असेही प्रशासनाने सांगितले.

या प्रश्नांबाबत अखिल भारतीय नाट्य परिषदेच्या कोथरुड उपनगरीय शाखेतर्फे महापालिकेला निवेदन देण्यात आले होते. त्यानुसार शिवसेना गटनेते पृथ्वीराज सुतार यांनी पुढाकार घेत या बैठकीचे आयोजन केले होते. या बैठकीला महापालिकेचे अतिरिक्त आयुक्त कुणाल खेमनार, अतिरिक्त आयुक्त ज्ञानेश्वर मोळक, विद्युत विभाग प्रमुख श्रीनिवास कंदुल, उपायुक्त संतोष वारुळे, नाट्यगृह व्यवस्थापक सुनील मते, नाट्य परिषदेच्या कोथरुड उपनगरीय शाखेचे अध्यक्ष सुनील महाजन, सहकार्यवाह सत्यजित धांडेकर, समीर हंपी, मोहन कुलकर्णी आदी उपस्थित होते.