Pune - उपोषणे, आंदोलने व पाठपुराव्याने गावात पालिकेने टँकरने पाणीपुरवठा सुरू केला. मात्र, गेली अनेक महिन्यांपासून ठेकेदाराकडून हे पाणी मोफत देण्याऐवजी विकले जात आहे. टँकरचालकाला अनेकदा समज देऊन व अधिकाऱ्यांना वारंवार सांगूनही या बाबीकडे दुर्लक्ष होत असल्याने संतापलेले कार्यकर्ते व काही ग्रामस्थांनी थेट टँकरर दगडफेक करून प्रशासनाविरोधात राग व्यक्त केला.

मांजरी बुद्रुक गावाचा दोन वर्षांपूर्वी महानगरपालिकेत समावेश झाला आहे. यापूर्वीची ग्रामपंचायतची सेवा मोडकळीस आल्याने गावात पाणी टंचाई जाणवत होती. गावठाण हद्दीतील काही कार्यकर्ते व ग्रामस्थांनी वेळोवेळी आंदोलने, मोर्चे काढून या प्रश्नाला वाचा फोडली. त्यामुळे काही दिवसांपासून या भागात पालिकेकडून टँकरने पाणीपुरवठा केला जात आहे.

मात्र, पाणीपुरवठा ठेकेदार अधिकाऱ्यांशी संगनमत करून हे पाणी मोफत न देता थेट विक्री करीत असल्याचे कार्यकर्त्यांच्या निदर्शनास आले होते. कार्यकर्त्यांनी ठेकेदार व टँकरचालकाला त्याबाबत समजही दिली होती. मात्र, पाणी विक्री सुरूच असल्याने पालिकेच्या पाणीपुरवठा अधिकाऱ्यांनाही याबाबत माहिती दिली होती. तरीही पाणी विक्रीवर कारवाई न होता संरक्षण दिले जात आहे. त्यामुळे संतापलेले काही ग्रामस्थ व कार्यकर्त्यांनी टँकरवर दगडफेक केली.

येथील माळवाडी, मांजराईनगर, गावठाण, सटवाईनगर, कुंजीर वस्ती आदी भागात टँकरने पाणी पुरवठा केला जात आहे. परंतु त्यामध्ये सामान्य नागरिक महिलांकडून पाण्यासाठी पैशांची मागणी केली जात आहे.

एक बॅलर पाण्यासाठी वीस रुपये तर खासगी ठिकाणी, हॉटेल, भाडेकरूच्या इमारती आदी ठिकाणी संपूर्ण टॅन्कर खाली करण्यासाठी पाचशे रुपयांपर्यंत रक्कम घेतली जात आहे, अशी तक्रार सुनील राखपसरे, विद्याधर भोसले, नवल कुंजीर, अनुराधा भोकरे, सविता मोगल, रेखा महिंद्रेकर, राधिका भिंताडे यांनी केली आहे.

"आगोदरच येथील सार्वजनिक पाणीपुरवठा विस्कळीत झाला आहे. पालिकेकडून मिळाणारे टँकरचे पाणीही अपुरे आहे. दोन वर्षे होऊनही पुरेसा पाणीपुरवठा होत नाही. मिळतात त्या टँकरच्या पाण्याची पुन्हा खासगी ठिकाणी विक्री केली जात आहे.

तसेच सामान्य नागरिकांचीही पाण्यासाठी कोंडी केली जात आहे. त्यामुळे नागरिक संतापलेले आहेत. भविष्यात ही परिस्थिती अशीच राहिली तर अधिकाऱ्यांना नागरिकांच्या रोषास सामोरे जावे लागेल.'

बाळासाहेब घुले, स्थानिक कार्यकर्ते