सिंहगड - खडकवासला येथील बिलाल मस्जिद ट्रस्टने गोऱ्हे बुद्रुक व एनडीए दहा नंबर गेट जवळील आदिवासी कातकरी कुटुंबांना मदत करत सामाजिक सलोख्याचा संदेश दिला आहे. गोऱ्हे बुद्रुक व एनडीए गेट येथील एकूण वीस कुटुंबांना दोन महिने पुरेल एवढ्या किराणा मालाचे वाटप करण्यात आले आहे.

मस्जिद मध्ये नमाज अदा केल्यानंतर मुस्लिम बांधव सामाजिक कार्यासाठी स्वखुशीने काही रक्कम दान करतात ज्याला 'जकात' म्हटले जाते.

खडकवासला येथील बिलाल मस्जिद ट्रस्ट या जकातीतून जमा झालेल्या रकमेचा उपयोग गरजू विद्यार्थ्यांना शिक्षणासाठी मदत, एखाद्या गरजू रुग्णाच्या खर्चासाठी किंवा इतर समाजोपयोगी उपक्रमासाठी करते. कोरोना आपत्कालीन परिस्थितीतही या ट्रस्टने परिसरातील शेकडो गरीब कुटुंबांना आधार दिला होता.

यावर्षी बिलाल मस्जिद ट्रस्टने जकातीतून जमा झालेल्या रकमेतून परिसरातील वीस आदिवासी कातकरी कुटुंबांना प्रत्येकी दोन महिने पुरेल इतक्या किराणा मालाची मदत करत सामाजिक सलोख्याचे दर्शन घडवले आहे.

यावेळी ट्रस्टचे अध्यक्ष हाजी नूर मोहम्मद सय्यद,तनवीर शेख, मौलाना रफिक सुतार, तनवीर सय्यद, सोहेल शेख, फिरोज खान,मजीद शेख, गुफरान शेख, कदीर शेख, जावेद शेख, आसिफ शेख, नरेंद्र हगवणे आदी उपस्थित होते.

" सकाळ'मुळे आम्हाला या आदिवासी कातकरी समाजाच्या व्यथांविषयी माहिती मिळाली. त्यानूसार आम्ही ट्रस्टच्या वतीने वीस आदिवासी कातकरी कुटुंबांना मदत केली आहे.

पवित्र कुराणातील उपदेशानुसार आमची जकात खऱ्या गरजूंसाठी गेली आहे. यापुढेही अशीच मदत करण्यात येणार आहे." नूर मोहम्मद सय्यद, अध्यक्ष, बिलाल मस्जिद ट्रस्ट, खडकवासला.