पुण्यामध्ये भटक्या कुत्र्यांचा उच्छाद मांडलेला असल्याचं पुन्हा एकदा समोर आलं आहे. या कुत्र्यांच्या हल्ल्यात पाच वर्षांचा एक चिमुरडा गंभीर जखमी झाला आहे. पुण्यातल्या उच्चभ्रू सोसायटीमध्ये ही घटना घडल्याने नागरिकांमध्ये संतापाचं वातावरण आहे.

पुण्यातल्या वडगाव शेरी परिसरातल्या सनसिटीमध्ये ही घटना घडली आहे. अनिरुद्ध जोंधळे नावाचा पाच वर्षांच्या मुलावर भटक्या कुत्र्यांनी हल्ला केला आहे. या हल्ल्यात तो गंभीर जखमी झाला आहे. त्याच्यावर खासगी रुग्णालयात उपचार सुरू आहेत. या परिसरात मोठ्या प्रमाणावर भटकी कुत्री आहेत. ते अनेकदा धावत्या गाडीमागे पळताना दिसतात.

ही कुत्री लहान मुलांवर तसंच इथल्या नागरिकांवरही हल्ला करत आहेत. भटक्या कुत्र्यांनी अनिरुद्धवर हल्ला केल्यानंतर सनसिटीमधले रहिवासी रस्त्यावर उतरले होते. या नागरिकांनी येरवडा पोलिस ठाण्यामध्ये जाऊन अशा घटना रोखण्यासाठी ठोस उपाय करण्यात यावे, अशी मागणी केली आहे.