बारामती - राष्ट्रवादीमध्ये अजित पवार यांनी भाजप सेनेच्या सरकारमध्ये सहभागी होत उपमुख्यमंत्रीपदाची शपथ घेतल्यानंतर आता ज्येष्ठ नेते शरद पवार व खासदार सुप्रिया सुळे यांनी बारामतीत आपल्या गटाची पक्षबांधणी जोमाने सुरु केली आहे.

बारामतीचे माजी नगराध्यक्ष विनोदकुमार गुजर यांचे चिरंजिव अँड. संदीप गुजर यांची राष्ट्रवादीच्या बारामती शहराध्यक्षपदी निवड करण्यात आली आहे. खासदार सुप्रिया सुळे यांनी त्यांना नियुक्तीचे पत्र प्रदान केले. काही दिवसांपूर्वीच अँड. एस.एन. जगताप यांना तालुकाध्यक्षपदाची जबाबदारी दिली होती.

दरम्यान अँड. राजेंद्र काटे देशमुख यांना राष्ट्रवादीच्या शरद पवार गटाच्या पुणे जिल्हा उपाध्यक्षपदाची तर प्रशांत बोरकर यांना बारामती तालुका युवकाध्यक्षपदाची जबाबदारी सोपविण्यात आली आहे.

अजित पवार यांनी वेगळी भूमिका घेत भाजपसोबत जाण्याचा निर्णय घेतल्यानंतर शरद पवार व सुप्रिया सुळे यांनी त्यांच्या भूमिकेच्या विरोधात निर्णय घेतला. पक्षात दोन गट पडल्यानंतर बारामतीत अजित पवार यांच्याकडे वर्चस्व असल्याचे चित्र होते.

आता मात्र राज्याच्या अन्य भागाप्रमाणेच बारामतीतही शरद पवार यांनी पक्षबांधणी नव्याने सुरु केल्याचे चित्र दिसत आहे. आगामी निवडणूकांमध्ये हा गट नेमकी काय भूमिका घेणार या कडे सर्वांचेच लक्ष आहे. ग्रामपंचायत निवडणूकीत तरी शरद पवार गटाने सक्रीय सहभाग नोंदविला नाही. मात्र आगामी काळात होणा-या निवडणूकांमध्ये हा गट सक्रीयपणे सहभागी होईल, अशी चिन्हे आहेत.

दरम्यान बारामती शहरात पक्षसंघटना मजबूत करण्यासोबतच बूथ कमिट्यांची रचना करुन प्रत्येक बूथवर कार्यकर्त्यांची नियुक्तीचे उद्दीष्ठ ठेवल्याचे अँड. संदीप गुजर यांनी निवडीनंतर सांगितले.