माळेगाव -  बारामती तालुक्यात शारदानगर, माळेगाव, मेडद गावच्या हद्दीमध्ये बिबट्याचा वावर दिसून आल्याने गावकऱ्यांमध्ये भितीचे वातावरण निर्माण झाले आहे. अन्न व निवाऱ्याच्या शोधात एक बिबट्या आज शारदानगर येथील देवकातेनगर, पवारवस्ती परिसरात दिसून आला.

(लोकल ते ग्लोबल लेटेस्ट अपडेट मिळवा सकाळच्या व्हॉट्सअप चॅनेलवर फक्त एका क्लिकमध्ये)

शुक्रवारी पहाटेच्यावेळी किरण पवार यांच्या शिवारात सदर बिबट्यायचे वास्तव्य दिसून आले. नीरा डावा कालव्यालगतच्या रस्त्याने ये-जा करणाऱ्या प्रवाशांनी मोबाईलद्वारे बिबट्याच्या वास्तव्याचे चित्रीकरण केले व ते सोशल मिडीयाद्वारे व्हायरल केले.

परिणामी गावकऱ्यांमध्ये कमालीची घबराट पसरली आहे. पोलिस व वन विभागाच्या अधिकाऱ्यांनी वरील घटनेची माहिती मिळताच घटनास्थळीची पाहणी सुरू केली आहे.  तसेच संबंधित बिबट्या पकडण्यासाठी वन खात्याने प्रतिबंधात्मक उपायोजना सुरू केल्याचे सांगण्यात आले.

याशिवाय वन खात्याने गावकऱ्यांना बिबट्याच्या हल्ल्यापासून बचावण्यासाठी मार्गदर्शन केले आहे, अशी माहिती वनपाल हेमंत मोरे, अमोल पाचपुते यांनी दिली. दरम्यान, मेडद भागात बिबट्यांच्या हल्ल्यात तीन शेळ्या ठार झाल्याची माहिती पुढे आली आहे.

सदर घटनेचा पंचनामा बारामती तालुक्याचे वन परिक्षेत्र अधिकारी शुभांगी लोणकर यांच्या अधिपत्याखाली झाला आहे. तसेच पशुधन हल्ल्यात नुकसान झालेल्या शेतकऱ्यांना शासकिय अर्थिक मदत मिळण्यासाठी प्रतीशेळी २० हजार प्रमाणे प्रस्ताव वरिष्ठ कार्य़ालयात पाठविले आले आहेत, अशी महिती वनपाल श्री. पाचपुते यांनी दिली.