पुणे - शिवाजीनगर ते हिंजवडीदरम्यानची मेट्रो पुणे महानगर प्रदेश विकास प्राधिकरणाकडून (पीएमआरडीए) केली जात आहे. केंद्र सरकारच्या "न्यू मेट्रो पॉलिसी'नुसार दुसऱ्या टप्प्यासाठी नवीन प्रस्ताव पाठविणार आहे, अशी माहिती "पीएमआरडीए'चे महानगर आयुक्त किरण गित्ते यांनी दिली. 

"पब्लिक प्रायव्हेट पार्टनरशिप' (पीपीपी) तत्त्वावर 23 किलोमीटर अंतराची मेट्रो केली जात आहे. महामेट्रोच्या पिंपरी ते स्वारगेट आणि वनाज ते रामवाडीसह शिवाजीनगर-हिंजवडी ही तिसरी मार्गिका असणार आहे. पीएमआरडीएकडून पीपीपी तत्त्वावर जरी ही मेट्रो केली जात असली, तरी महामेट्रोसोबत संयुक्त प्रकल्प राबविण्यात येत आहे. 

दरम्यान, देशातील मेट्रो प्रकल्पांना गती देण्यासाठी केंद्राने न्यू मेट्रो पॉलिसी तयार केली आहे. त्यानुसार सर्व मेट्रोचे सुधारित प्रस्ताव केंद्राकडे पाठवावे लागणार आहेत. मेट्रोचा दुसरा टप्पा रामनगर, लक्ष्मीनगर ते हिंजवडी असा असणार आहे. दुसऱ्या टप्प्यासाठी प्रस्ताव पाठविला जाईल. त्यामध्ये पिण्याचे पाणी, गॅसलाइन, स्टेशनच्या उभारणीसाठी भूसंपादन, विकसन आणि देखभाल-दुरुस्तीचा अंतर्भाव करण्यात येईल. डिलाइट आणि जेएसएल या खासगी संस्थेकडून प्रस्ताव बनविला आहे, असेही गित्ते यांनी सांगितले. 

बालेवाडीमध्ये "मल्टिनोडल हब' बनविण्यात येत आहे. तसेच मेट्रोच्या कारशेडसाठी 50 एकर जागेच्या हस्तांतराची प्रक्रिया अंतिम टप्प्यात आहे. यापैकी 15 एकर जागेच्या मालकाचे संमतीपत्र मिळणे बाकी आहे. उर्वरित सर्व जागामालकांचे पत्र मिळाले आहे. जिल्हा प्रशासनाकडून पुढील प्रक्रिया करून जागा ताब्यात घेतली जाईल. 
- किरण गित्ते, पीएमआरडीए, महानगर आयुक्त.