पुणे - पुणे शहरात साखळी बॉम्बस्फोट किंवा मोठा घातपात घडवून आणण्याचा दहशतवाद्यांनी कट रचला होता‌. याबाबत दहशतवाद्यांना सिरीयामधून सूचना मिळत होत्या, अशी खळबळजनक माहिती तपासात समोर आली आहे.

पुणे इसिस मॉड्युल प्रकरणात राष्ट्रीय तपास संस्थेने (एनआयए) नुकत्याच पकडलेल्या दहशतवाद्याकडून तपासात ही माहिती मिळाल्याची माहिती विश्वसनीय सूत्रांनी दिली.

एनआयएने महम्मद शाहनवाझ आलम (रा. न्यू महमूदा हाऊस, हजारीबाग, झारखंड) याला नुकतीच अटक केली आहे. त्याला कोठून अटक केली, ही माहिती गोपनीय ठेवण्यात आली आहे. पुणे इसिस मॉड्युल प्रकरणात यापूर्वी अटक केलेल्या इतर आरोपींशी शाहनवाझ आलमचा थेट संबंध होता. शाहनवाझने बॉम्बस्फोट घडवून आणण्यासाठी विविध ठिकाणांचा शोधही घेतला होता.

कोथरूड परिसरात १९ जुलै २०२३ रोजी महम्मद इम्रान खान आणि महम्मद युनूस साकी याच्यासह शाहनवाझ आलमला

दुचाकी चोरीचा प्रयत्न करताना पुणे पोलिसांनी पकडले होते. परंतु घरझडती घेण्यासाठी जात असताना शहानवाझ कोंढवा परिसरातून पोलिसांच्या तावडीतून पळून गेला होता.

एनआयएकडून पुणे पोलिसांचे कौतुक :

एनआयएने पुणे पोलिसांना पत्र पाठवले आहे. त्यात दहशतवाद्यांकडून होणाऱ्या घातपाताचा मोठा कट उध्वस्त केल्याबद्दल पुणे पोलिसांचे कौतुक केले आहे.