पुणे : दिवसभर दमट आणि संध्याकाळी अवकाळी पावसाच्या तडाख्यातून बुधवारी पुणेकरांची सुटका झाली खली. मात्र, दुपारी उन्हाच्या चटक्यामुळे अंगाची अक्षरशः लाही लाही झाली होती. दुपारी १२ वाजेच्या दरम्यान शहरातील कमाल तापमानाने पुन्हा ४०.१ अंश सेल्सिअस नोंदविले गेले. म्हणजे एकीकडे अवकाळी पावसाची शक्यता असतानाच शहरात आता उन्हाचे चटके वाढत आहे.

बुधवारी सकाळपासूनच वातावरणात दमटपणा जास्त होता, तर दुपारी अंगाची लाही होईल अशा प्रकारे उन्हाचा चटका जानवत होता. काल परवा पर्यंत काहीसे थंड असलेले हवामानात अचानक झालेल्या या बदलामुळे सर्वच हैराण झाले होते.

अवकाळी पावसाचे ढग आता काहीसे दूर झाले असून, पुढील तीन दिवस तरी शहरात आकाश मुख्यतः निरभ्र राहण्याची शक्यता हवामान खात्याने वर्तवली आहे. त्यामुळे पुढील काही दिवस तरी दुपारचा हा उन्हाचा चटका पुणेकरांना सहन करावा लागणार आहे. या कालावधीत उष्ण आणि दमट असणाऱ्या हवामानाचा नागरिकांना त्रास होण्याची शक्यता जास्त आहे.

राज्यातही वादळी पावसाने उघडीप देताच उन्हाच्या झळा वाढल्या आहेत. अनेक ठिकाणी पारा चाळीशीपार गेला असून, विदर्भ, उत्तर महाराष्ट्रात उन्हाचा चटका अधिक आहे. गुरूवारी (ता. ११) राज्यात उष्ण व कोरड्या हवामानाचा अंदाज असून, कमाल तापमानात ३ ते ४ अंशांची वाढ होणार आहे. तर कोकणात दमट आणि उष्ण हवामान अधिक त्रासदायक ठरण्याची शक्यता हवामान विभागाने वर्तविली आहे.

बंगालच्या उपसागरातील वादळी प्रणालीपासून दक्षिण आंध्र प्रदेशापर्यंत समुद्र सपाटीपासून ५.८ किलोमीटर उंचीवर कमी दाबाचा पट्टा सक्रिय आहे. आजपासून (ता. ११) राज्यात मुख्यतः उष्ण कोरड्या हवामानाची शक्यता आहे. राज्यात उन्हाचा चटका आणि उकाड्यातील वाढ कायम राहण्याचा अंदाज आहे.

शहरातील कमाल तापमान (अंश सेल्सिअसमध्ये)

- शिवाजीनगर - ४०.१

- पाषाण - ४०.१

- लोहगाव - ४०.१

- चिंचवड - ४१.८

- लवळे - ४१.८

- मगरपट्टा - ४०.९