Pune Crime - वैद्यकीय तपासणीसाठी ग्रामीण रुग्णालयात आलेल्या तक्रारदारांमध्ये हाणामारी सुरू झाल्याने आज ता.२६ रोजी रुग्णालयात मोठा गोंधळ उडाला.

बादशहा तलाव येथील भांडणातील दोन्ही बाजूच्या बारा जणांना जुन्नर पोलिसांनी ग्रामीण रुग्णालयात वैद्यकीय तपासणीसाठी पाठवले होते. यावेळी वैद्यकीय अधिकारी व कर्मचाऱ्यांनी मध्यस्थी करून भांडणे सोडविली. पोलीस कर्मचारी आल्यानंतर रुग्णालयात शांतता झाली. या सर्व प्रकाराची शहरात मोठी चर्चा झाली.

पोलीस ठाण्यात मारामारीच्या तक्रारी घेऊन गेल्यानंतर तक्रारदारांना पत्र देऊन वैद्यकीय तपासणीसाठी ग्रामीण रुग्णालयात जाण्यास सांगण्यात येते. पोलीसांकडून तक्रारदारांना वाहन किंवा सोबत कर्मचारी दिला जात नाही यातून हा प्रकार घडला असल्याचे सांगण्यात आले.

बादशहा तलाव ता. जुन्नर येथे दोन कुटुंबात पूर्वीच्या भांडणाच्या कारणावरून लोखंडी शिग, चाकू, लाठी काठी आदीने हाणामारी झाली. यात जखमी झालेल्यांनी जुन्नर पोलीस ठाणे गाठले.

येथे पोलिसांनी दोनही कुटुंबातील बारा जखमींना वैद्यकीय तपासणीसाठी ग्रामीण रुग्णालय जुन्नर येथे पाठविले होते. त्यांच्यात पुन्हा भांडणे होऊन व मारामाऱ्या झाल्या असल्याचे वैद्यकीय अधिकाऱ्यांकडून सांगण्यात आले.