पुणे : कोरोच्या तिसऱ्या लाटेचा इशारा दिलेला असताना शिवाजीनगर येथील शासकीय अभियांत्रिकी महाविद्यालयाच्या मैदानावरील जम्बो रुग्णालयास तीन महिने मुदतवाढ देण्याचा आली आहे. स्थायी समितीमध्ये हा प्रस्ताव मंजूर करण्यात आला. महापालिकेने उभारलेल्या जम्बो रुग्णालयात ६०० ऑक्सिजन बेड, १०० आयसीयू बेड व २०० एचडीयू बेड आहेत. दुसऱ्या लाटेत हे रुग्णालय पुणेकरांसह शहराबाहेरील नागरिकांसाठी वरदान ठरले होते.

या रुग्णालयाची मुदत ३० जून रोजी संपली होती, त्यानंतर पुढे नऊ जुलैपर्यंत मुदतवाढ दिली होती. तसेच हे रुग्णालय पुढे सुरू ठेवायचे असल्यास त्याचे स्ट्रक्चरल ऑडिट करून घेतले असता, जानेवारी २०२२ पर्यंत त्याचा वापर करता येऊ शकतो असा अहवाल प्राप्त झाला आहे. त्यामुळे आणखी चार महिने महापालिकेकडे आहेत.

कोरोनाच्या तिसऱ्या लाटेची शक्यता वर्तविली असल्याने आयुक्तांनी नुकतीच प्रशासनाची बैठक घेऊन तयारीचा आढावा घेतला, त्यामध्ये जम्बो सुरू करण्याची तयारी ठेवा असेही सांगितले होते. त्यानंतर आज स्थायी समितीमध्ये तीन महिने मुदतवाढ देण्यात आली आहे. जम्बोमधील सेवा, वैद्यकीय उपचार देण्याचे काम पूर्वीच्याच खासगी संस्थांकडे असणार आहे.