Katraj: वडील सैन्यामध्ये असल्याने वडिलांच्या अंगावरील खादी पाहून वडिलांचा आदर्श डोळ्यासमोर ठेवत फौजदार होण्याचे स्वप्न उराशी बाळगून कात्रजच्या निकिता पाचांगणे हिने ते पूर्ण केले आहे. महापालिकेच्या शाळेत शिकणारी निकिता फौजदार झाल्याने कात्रज परिसरातून तिचे कौतुक होत आहे.

वडिलांप्रमाणे निकीताचेही वर्दीवर प्रेम होते म्हणूनच काहीतरी करून आपण आपली ओळख व अस्तित्व निर्माण करायचं ठरवलं आणि महाराष्ट्र राज्यसेवा आयोगाच्या परिक्षा देण्याचे तिने ठरविले. त्यानुसार तयारीही सुरु केली.

प्राथमिक शिक्षण कात्रजच्या महापालिकेच्या शाळेत, माध्यमिक शिक्षण महापालिकेच्या शुक्रवार पेठेतील शाळेत तर आबासाहेब गरवारे महाविद्यालयातून विज्ञान शाखेत तिने पदवी मिळविली. त्यानंतर स्पर्धा परिक्षांची तयारी सुरु केली. २०२०मध्ये तिला अपयश आले.

परंतु, जिद्द न हारता व मनोधैर्य खचू न देता तिने अभ्यास सुरु ठेवला. २०२१ला पूर्व परीक्षा दिली व त्यात ती पास झाली. परंतु, मुख्य परीक्षेत तिला अपयश आले. २०२२मध्ये राज्यसेवा व पीएसआय (पोलिस उपनिरिक्षक) दोन्ही पूर्व परीक्षांत तिला घवघवीत यश मिळाले.

निकीताचे वडील जालिंदर पाचांगणे यांनी अर्थिक चणचण कधी भासू दिली नाही. तर, भाऊ वैभव पाचांगणे शिक्षक असल्याने त्यांनी तिला मोलाचे मार्गदर्शन केले. आई पद्मावती पाचांगणे यांनी घरची जबाबदारी कधी येऊ दिली नाही.

स्वतःला सिद्ध करण्यासाठी मानसिकरीत्या स्थिर राहण्याची तिची खरी धडपड होती. मित्रमैत्रिणी, सोशल मीडियाच्या दूनियेतून बाहेर पडून पुस्तकांशी घट्ट मैत्री करून सतत त्यांच्यासोबत राहणे हे तिच्यासमोर मुख्य आव्हान होते आणि ते लिलया पेलत फौजदार पदाला गवसणी घातली आहे.