पुणे - सावित्रीबाई फुले पुणे विद्यापीठाने (Pune University) प्रथम सत्र परिक्षेचे निकाल (Exam Result) लावण्यास सुरवात केली, पण कोरोनामुळे प्रॅक्टीकलच्या परीक्षांचे गुण (Exam Marks) विद्यापीठाला मिळालेले नाहीत. त्यामुळे निकाल लावताना गुणपत्रिकेवर प्रॅक्टीकलच्या रकान्यातण'एनए’ म्हणजेच नॉट ॲव्हलेबल (Not Available) असा शेरा (Remark) मारला आहे. अंतिम वर्षातील विद्यार्थी (Student) नोकरीसाठी (Job) प्रयत्न करत असताना गुणपत्रिकेवरील ‘एनए’ या शेऱ्याने नोकरीची संधी धोक्यात (Danger) आली आहे. (Pune University NA Remark Issue Job Opprtunity Danger)

कोरोनामुळे गेल्या वर्षभरात महाविद्यालये सुरू होऊ शकली नाहीत. पुणे विद्यापीठात क्रेडिट पॅटर्न असल्याने त्यामध्ये अंतर्गत मूल्यमापन व प्रॅक्टिकल या गुणांना महत्त्व आहे. त्यामुळे महाविद्यालयांनी विद्यार्थ्यांना ऑनलाइन वेगवेगळे प्रोजेक्ट देऊन ते पूर्ण करण्यास सांगितले. ही विद्यार्थ्यांची कामगिरी प्रथम सत्राच्या निकालात ग्राह्य धरली जाईल असे सांगण्यात आले होते. त्यानुसार विद्यार्थ्यांनी महाविद्यालायांना प्रोजेक्ट पूर्ण करून पाठविले आहेत.

पुणे विद्यापीठाने एप्रिल महिन्यात पासून प्रथम सत्राची ऑनलाइन परीक्षा घेण्यास सुरवात केली. त्याचे ऑनलाइन निकाल जाहीर केले जात आहेत. विद्यार्थ्यांना मिळालेल्या गुणपत्रिकेत प्रॅक्टीकलच्या रकान्यात नॉट ॲव्हलेबल असा शेरा मारलेला आहे. पण आता त्याचा फटका अंतिम वर्षात शिकणाऱ्या विद्यार्थ्यांना बसत असून, इंजिनिअरिंग, फार्मसी, आर्किटेक्चर यासह इतर अभ्यासक्रमाचे विद्यार्थी शेवटचे सत्र शिल्लक असतानाच प्लेसमेंटसाठी अर्ज करताना. त्यांना कंपन्यांकडून यावेळी गुणपत्रिका मागविली जाते. अनेक कंपन्या एका विषयात जरी नापास असले तरी विद्यार्थ्यांची निवड करत नाहीत. आता तर सर्वच प्रॅक्टिकलच्या विषयांपुढे एनए असेच दाखविले जात आहे. जेव्हा विद्यापीठाकडून अंतिम सत्राच्या परीक्षा घेतल्या जातील तेव्हाच प्रॅक्टीकलचे गुण देखील त्यात दिसणार आहेत.

‘नोकरीसाठी अर्ज करताना लेटेस्ट गुणपत्रिका अपलोड करायला सांगितली जाते, पण माझ्या सह अनेक विद्यार्थ्यांच्या गुणपत्रिकेवर ‘एनए’ असा शेरा आल्याने विद्यार्थ्यांमध्ये नोकरी गमविण्याची भीती आहे. यावर तोडगा काढला पाहिजे.’

- अनिकेत कांबळे, अंतिम वर्ष, इंजिनिअरींग

‘गेल्याच महिन्यात कॉलेजने आमच्याकडून प्रॅक्टिकल म्हणून प्रोजेक्ट करून घेतले आहेत. तरीही गुणपत्रिकेत ‘एनए’ असा शेरा येत आहे. असे असेल तर आम्हाला नोकरी मिळविण्यात अडचणी येतील. गुणांचा समावेश असलेली गुणपत्रिका मिळाल्याशिवाय काही करता येणार नाही.’

- शंतनू गव्हाणे, अंतिम वर्ष, इंजिनिअरींग

‘कोरोनामुळे प्रॅक्टिकलच्या परीक्षा घेण्यावर मर्यादा आल्या, आता दोन्ही सत्राच्या परीक्षा होणार आहे. गुणपत्रकिकेवर नॉट ॲव्हलेबल असे लिहिले असले तरी प्रॅक्टिकलचे गुण जसे जसे उपलब्ध होतील, तसा निकाल अद्ययावत केला जाईल. विद्यार्थ्यांनी घाबरून जाऊ नये.’

- डॉ. महेश काकडे, संचालक, परीक्षा मंडळ, पुणे विद्यापीठ