मुंढवा : उपनगरात एकीकडे पाणी टंचाईची समस्या निर्माण होत असते, तर दुसरीकडे मुंढवा येथील कामगार मैदानात गळतीद्वारे गेल्या तीन दिवसांपासून हजारो लिटर पाणी वाया जात आहे. येथील गळती निवारण करण्याकडे पाणी पुरवठा विभागाचे साफ दुर्लक्ष झाले आहे. परिणामी केशवनगरमध्ये नागरिकांना पाणी टंचाईला तोंड द्यावे लागत आहे. येथे लवकर दुरूस्ती करावी अशी मागणी रहिवाश्यांनी केली आहे.

कामगार मैदानतील जलवाहिनीला गळती लागून तिन दिवसांपासून हजारो लिटर पाणी वाहत असून, ते पाणी संपुर्ण रस्त्यावर पसरले आहे. त्यामुळे दुचाकी वाहन चालकांना कसरत करावी लागत आहे. दुचाकी घसरून अपघातास तोंड द्यावे लागत आहे. मोठा अपघात होण्याआधी पाणीपुरवठा विभागाने दुरूस्ती करावी अशी मागणी होत आहे.

मुंढवा-केशवनगर परिसरातही काही ठिकाणी जलवाहिन्यांना गळती लागून दररोज पाणी वाया जात आहे. पण गळती निवारण करण्याकडे पाणी पुरवठा विभागाच्या अधिकाऱयांचे दुर्लक्ष झाले आहे. पण त्याचा फटका थेट नागरिकांना बसत आहे. याकडे पाणी पुरवठा विभागासह पालिकेने दुरूस्ती करावी अशी मागणी होत आहे.

याबाबत पाणीपुरवठा विभागाचे कनिष्ठ अभियंता इंद्रजीत देशमुख म्हणाले, मी लगेचच दुरूस्ती करून घेतो.