पुणे : पत्नीकडून सातत्याने खोट्या तक्रारी करून त्रास दिला जात असल्यामुळे तसेच त्यामुळे होणाऱ्या बदनामीला कंटाळून एका व्यक्तीने विष प्राशन करून आत्महत्या केली. ही घटना शुक्रवारी वारजे परिसरात घडली. याप्रकरणी पत्नीविरुद्ध पतीस आत्महत्या करण्यास प्रवृत्त केल्याप्रकरणी वारजे माळवाडी पोलिस ठाण्यात गुन्हा दाखल करण्यात आला.

प्रकाश संभाजी चौघुले (वय ३३) असे आत्महत्या केलेल्या व्यक्तीचे नाव आहे. तर स्नेहल प्रकाश चौघुले (वय २८, रा. वारजे) असे गुन्हा दाखल झालेल्या महिलेचे नाव आहे. याप्रकरणी प्रकाश यांचे भाऊ गिरीश संभाजी चौघुले (वय ३०) यांनी फिर्याद दिली आहे.
प्रकाश व स्नेहल यांचे काही वर्षांपूर्वी लग्न झाले होते. काही दिवसांपासून त्यांच्यात वाद सुरू होते. दरम्यान, पत्नीने त्यांच्याविरुद्ध खोट्या तक्रारी दिल्या होत्या. त्यामुळे नातेवाईक व कंपनीमध्ये त्यांची बदनामी झाली होती. या मानसिक त्रासामुळे त्यांनी विष प्राशन करून आत्महत्या केली. या घटनेनंतर त्यांचे भाऊ गिरीश यांनी वारजे माळवाडी पोलिस ठाण्यात फिर्याद दिली. त्यावरुन पत्नी स्नेहल विरुद्ध आत्महत्या करण्यास प्रवृत्त केल्याप्रकरणी गुन्हा दाखल करण्यात आला.