बारामती - राज्य आणि देशापुढे अनेक महत्वाचे प्रश्न (Important Question) आहेत, असे असताना केंद्रातील सरकार (Central Government) व राज्यातील विरोधी पक्ष महागाईच्या मुद्यापासून लपत आहेत, गंभीर प्रश्नांकडे दुर्लक्ष करुन हल्ली पेन ड्राईव्हचे नवीन फॅड सुसंस्कृत महाराष्ट्राला न शोभणारे असल्याचा आरोप खासदार सुप्रिया सुळे यांनी केला आहे. बारामतीत माध्यमांशी त्या बोलत होत्या.

सुप्रिया सुळे म्हणाल्या, ईडी किंवा सीबीआयच्या कारवाई संदर्भात राज्यातील काही नेते अगोदरच बोलतात या बाबत अर्थमंत्री निर्मला सीतारामन यांनी लोकसभेत माझ्या प्रश्नाला उत्तर दिलेले आहे, कुणीही आयुष्यभर सत्तेत नसते, नियम कायदे बनविले जातात, विरोधकांना त्रास व्हावा या साठी सत्तेचा गैरवापर होऊ नये, असा प्रयत्न सर्वांनी करावा, सूडाचे राजकारण या देशात या पूर्वी कधीच नव्हत, मात्र सातत्याने सध्या ते दिसतय, दुर्देवाने देशासमोरचे महत्वाचे विषय असलेल्या महागाई, इंधनदरवाढ, बेरोजगार या कोविडमुळे निर्माण झालेले प्रश्न सोडविण्यास प्राधान्य देत त्या वर मात करण्याचा प्रयत्न व्हायला हवा. आरोप प्रत्यारोप करण्यासाठी निवडणूका आहेत.

काळाची गरज ओळखून देश आणखी कसा पुढे जाईल, सामान्य जनतेला इंधन दरवाढीपासून दिलासा कसा देता येईल, हे बघणे जास्त महत्वाचे असल्याचे सुप्रिया सुळे म्हणाल्या.

विकासाचे बारामती मॉडेल पाहण्यासाठी तसेच केंद्र व राज्य शासनाच्या योजना बारामतीत कशा राबविल्या गेल्या आहेत हे पाहण्यासाठी सर्व पक्षीय खासदारांचे शिष्टमंडळ बारामतीला दोन दिवस भेट देऊन गेल्याचीही माहिती सुप्रिया सुळे यांनी दिली. त्यांचा मतदारसंघ व बारामती मतदारसंघात योजनांसह इतर काही चांगल्या गोष्टींचे आदानप्रदान होऊ शकते का या बाबत या दौ-यात खासदारांनी चाचपणी केली असल्याचेही त्या म्हणाल्या.