राष्ट्रवादीच्या फुटीनंतर प्रथमच राष्ट्रवादीचे ज्येष्ठ नेते शरद पवार, उपमुख्यमंत्री अजित पवार आणि खासदार सुप्रिया सुळे यांच्यासह पवार कुटुंबातील इतर सदस्यही एकाच व्यासपीठावर असणार आहेत. दौंड तालुक्यातील स्वामी चिंचोली येथील विद्या प्रतिष्ठान संस्थेने उभारलेल्या अनंतराव पवार इंग्लिश मीडियम स्कूलच्या नव्या वास्तूचे उद्घाटन शरद पवार यांच्या हस्ते होणार आहे. त्यामुळे अजित पवार, शरद पवार आणि सुप्रिया सुळे एकाच मंचावर आहेत.

दरम्यान, राष्ट्रवादीतील फुटीनंतर पहिल्यांदाच हे नेते या कार्यक्रमाच्या निमित्तानं एकत्र येत आहेत. त्यामुळं या कार्यक्रमाकडे अवघ्या राज्याचं लक्ष लागलं आहे. अशातच राजकारण बाजूला ठेवत नणंद भावजय एकत्र दिसून आल्या. शाळेच्या उद्घाटन कार्यक्रमाला अजित पवार यांच्या पत्नी सुनेत्रा पवार आणि खासदार सुप्रिया सुळे यांनी एकत्र फोटो सेशन केलं आहे. दौंड तालुक्यातील अनंतराव पवार शाळेच्या नवीन वास्तूच्या उद्घाटन सोहळ्याला दोघी एकत्रित दिसून आल्या

दरम्यान पक्ष फूटीपासून बारामती लोकसभा मतदार संघातून आगामी निवडणुकीत शरद पवार गटाकडून सुप्रिया सुळे तर अजित पवार गटाकडून सुनेत्रा पवार लढणार असल्याच्या चर्चा आहेत. दरम्यान राजकीय मतभेद सोडून नणंद भावजय एकत्र दिसून आल्या.

पवार काका-पुतणे एका मंचावर आले तरी शेजारी बसणार नाहीत

पुणे जिल्ह्यातील दौंड तालुक्यातील मौजे चिंचोली येथील अनंतराव पवार इंग्लिश मिडीयम स्कुलच्या नूतन वास्तूच्या उद्घाटन कार्यक्रमाला शरद पवार आणि अजित पवार हे दोघे ही एकत्र आहेत. मात्र ज्या स्टेजवर आज हे नेते एकत्र येणार आहेत तिथल्या आसनव्यवस्थेचा क्रम बरचं काही सांगून जातोय.

खुर्च्यांवर कोण कुठे बसणार त्यानुसार नावांच्या पट्ट्या चिटकवण्यात आल्या आहेत. पवार काका पुतणे या कार्यक्रमात शेजारी शेजारी बसतील असे वाटत होते. स्टेजवर बसून ते एकमेकांना बोलतात का याची उत्सुकता होती. मात्र, दोघांच्या मधे प्रतिभा पवार यांची खुर्ची ठेवण्यात आल्याचे दिसून आले आहे. प्रतिभा पवार यांच्या उजवीकडे शरद पवार बसतील तर डावीकडे अजित पवार बसतील अशी व्यवस्था करण्यात आली आहे.