पुणे - पुणे शहरात (Pune City) गुरुवारी पावसाचे (Rain) दमदार ‘कम बॅक’ (Come Back) झाले. सकाळपासून पावसाच्या सरीवर सरी पडत होत्या. पुढील दोन दिवस पावसाची रिमझिम सुरू राहणार आहे. शहराच्या परिसरातील घाटमाथ्यावर पावसाचा जोर वाढणार असल्याने पुणेकरांनी घरातच सुरक्षित राहावे, असे आवाहन हवामान खात्यातर्फे करण्यात आले. (Rain Come Back in Pune)

पुणे शहर आणि परिसरात गेल्या दोन दिवसांपासून ढगाळ वातावरण होते. पावसाच्या हलक्या सरी हजेरी लावत होत्या. नैर्ऋत्य मोसमी वारे (मॉन्सून) दाखल होऊन प्रत्यक्ष पावसाने मात्र दडी मारली होती. हे चित्र शुक्रवारी सकाळपासून बदलले. शहरात पावसाने पुन्हा दमदार हजेरी लावली. सकाळी सहा वाजल्यापासून पावसाच्या सरींना सुरवात झाली. विशेषतः सिंहगड रस्ता, पाषाण, कोथरूड, वारजे, कात्रज भागात पावसाच्या एकामागोमाग एक मोठ्या सरी पडत होत्या.

त्यानंतर शहराच्या मध्य वस्तीतील पेठांमध्येही दुपारनंतर पावसाला सुरवात झाली. संध्याकाळपर्यंत या सरी पडत होत्या.

पुणे शहर आणि परिसरात मोठ्या प्रमाणात ढग जमा झाले आहेत. हवेतील बाष्पाचे प्रमाणही वाढले आहे. तसेच, वाऱ्याचा वेगही पावसाला पोषक आहे. त्यामुळे शहर आणि परिसरात पुढील दोन दिवस पावसाच्या सरी पडतील, असा अंदाज हवामान खात्याने वर्तविला आहे.

हवामानाचा अंदाज

• १८ जून : हलक्या ते मध्यम स्वरूपाच्या पावसाची शक्यता. घाट भागात तुरळक ठिकाणी मुसळधार पाऊस पडण्याचा अंदाज

• १९ जून : आकाश अंशतः ढगाळ राहून दुपारी किंवा संध्याकाळी पावसाच्या हलक्या सरी पडण्याची ५१ ते ७५ टक्के शक्यता

गुरुवारचा पाऊस

• सकाळी साडेआठ वाजेपर्यंत पडलेला पाऊस : ३.९ मिलिमीटर

• सकाळी साडेआठ ते संध्याकाळी साडेपाच वाजेपर्यंत नोंदलेला पाऊस : ११.५ मिलिमीटर

पुणे जिल्ह्यात मोठ्या प्रमाणात ढग जमा झाले आहेत. पुणे जिल्ह्यात पुढील चोवीस तासांमध्ये मध्यम ते हलक्या पावसाची शक्यता आहे. येत्या शनिवारपर्यंत (ता. १९) पावसाच्या सरी पडतील. त्यानंतर शहर आणि परिसरातील पावसाचा जोर ओसरले.

- डॉ. अनुपम काश्यपी, हवामान शास्त्रज्ञ, भारतीय हवामान खाते