पुणे : शहरात गेल्या पाच - सहा दिवसांपासून पावसाने मुक्काम ठोकला आहे. गुरुवारी (ता. २२) शहरासह उपनगरात पावसाच्या जोरदार सरींनी हजेरी लावली. पुढील पाच दिवस शहर आणि परिसरात हलक्या स्वरूपाच्या पावसाचा अंदाज हवामान विभागाने वर्तविला आहे. त्याचबरोबर पुढील दोन दिवस घाट माथ्यावर मुसळधार पावसाचा इशारा देण्यात आला आहे.

पावसाच्या जोरदार सरींमुळे गुरूवारी नागरिकांची चांगली तारांबळ उडाली तर शहरात सायंकाळी ५.६ मिलिमीटर तर, लोहगाव येथे ६.२ मिलिमीटर इतक्या पावसाची नोंद झाली. हवामान विभाग मुंबईच्यावतीने पुणे जिल्ह्यासाठी गुरुवारी (ता. २२) रेड अलर्ट जारी केला. अतिवृष्टीमुळे जिल्ह्यातील विविध तालुक्यात नुकसानीच्या घटना घडल्या. दरम्यान, जिल्ह्यात शुक्रवारी (ता. २३) मध्यम स्वरूपाच्या पावसाचा इशारा देण्यात आला आहे. त्यानंतर तुरळक पावसाची शक्यता आहे.