पुणे - ‘‘स्वतःसोबतच इतरांचेही जीवन प्रकाशमान व्हावे, या विचारांनी गरजू विद्यार्थ्यांना मुख्य प्रवाहात आणण्याचे संस्थेचे कार्य उल्लेखनीय आहे,’’ असे प्रतिपादन मराठवाडा मित्रमंडळाचे कार्याध्यक्ष भाऊसाहेब जाधव यांनी केले. राजर्षी शाहू महाराज सोशल फाउंडेशनच्या वतीने आयोजित ‘राजर्षी शाहू महाराज महोत्सवा’प्रसंगी ते बोलत होते. संभाजी ब्रिगेडचे प्रदेश निरीक्षक विकास पासलकर म्हणाले, ‘‘शाहू महाराजांचे विचार हे प्रत्यक्ष कृतीत उतरविण्याची गरज आहे, तरच समाजातील उपेक्षित घटकांना न्याय मिळेल. गरजूंना मदत करण्याचा विचार सर्वांनी आत्मसात करावा.’’ याप्रसंगी ज्येष्ठ विधिज्ञ मिलिंद पवार उपस्थित होते.

मराठा सेवा संघाचे प्रकाश जाधव, विजय महाराज बारस्कर, राजेंद्र कोंढरे, कोमल पवार, संजय गायकवाड, पत्रकार शिरीष रणदिवे, क्रीडापटू समर्थ पांढरबळे, अंशुमन धावडे, युवराज सूर्यवंशी, अभिनेता योगेश तनपुरे यांना ‘राजर्षी शाहू महाराज सामाजिक पुरस्कारा’ने सन्मानित करण्यात आले. संस्थेच्या माध्यमातून ग्रामीण विद्यार्थ्यांसाठी कार्य करणारे लहू पडवळ, धोंडिबा घारे, तानाजी चिकणे, संदीप खाटपे यांना ‘परिवर्तन दूत’ पुरस्काराने गौरविण्यात आले. 

या वेळी संस्थेच्या विशेषांकाचे आणि संतोष तळेकर यांच्या ‘आदर्शाचे मानबिंदू’ पुस्तकाचे प्रकाशन झाले. कार्यक्रमासाठी संस्थेचे अध्यक्ष कैलास वडघुले, प्रशांत धुमाळ, अनिल माने, मंदार बहिरट, सौरभ भिलारे यांनी सहकार्य केले.