पुणे - उच्च न्यायालयाचे खंडपीठ पुण्यात स्थापन करण्याचा ठराव होऊन ४२ वर्षे होत आली, तरी त्यावर अद्याप काही ठोस निर्णय झालेला नाही. त्यामुळे हजारो पक्षकार आणि वकील न्यायालयीन कामकाजासाठी दररोज मुंबईत चकरा मारत आहेत. त्यांची ही गैरसोय टाळण्यासाठी पुण्यात तूर्तास उच्च न्यायालयाचे फिरते खंडपीठ सुरू व्हावे, अशी भूमिका येथील लोकप्रतिनिधी आणि वकिलांनी घेतली आहे. 

ताज्या बातम्यांसाठी डाऊनलोड करा ई-सकाळचे ऍप

खंडपीठाच्या मागणीसाठी येथील वकील अनेक वर्षांपासून प्रयत्नशील आहे. मात्र, अद्याप त्यांना यश आलेले नाही. पण, पुण्यातून उच्च न्यायालयात दाखल होणाऱ्या दाव्यांची संख्या वाढतच आहे. त्यामुळे फिरते खंडपीठ त्यावर तात्पुरता दिलासा ठरणार आहे. 

पुणे - डझनभर मार्गांवर मेट्रो

याबाबत आमदार अनंत गाडगीळ म्हणाले, ‘‘पुण्यातील खंडपीठाबाबत तीन जणांची समिती नेमू व त्यांच्या अहवालानंतर निर्णय घेऊ, असे आश्‍वासन माजी मुख्यमंत्री देवेंद्र फडणवीस यांनी दिले होते. पुण्याला खंडपीठ द्यावे, ही माझी पहिल्यापासूनची भूमिका असून, सातत्याने पाठपुरावा केला आहे. लगेच खंडपीठ देणे शक्‍य नसेल, तर तूर्तास फिरते खंडपीठ द्यावे. महिन्यातील आठ दिवस किंवा वर्षातून दोन महिने खंडपीठ पुण्यात आले, तरी त्याचा मोठा फायदा होईल.’’

कोल्हापूरच्या भूमिकेबाबत गाडगीळ म्हणाले, ‘‘कोल्हापूर आणि परिसरातील वकिलांचा पुण्यातील खंडपीठास विरोध आहे. मुंबईच्या तुलनेत पुण्याला जाण्यास आम्हाला जास्त वेळ लागतो, अशी त्यांची भूमिका आहे. त्यामुळे अंतर महत्त्वाचे की दावे लवकर निकाली लागणे, याचा विचार व्हावा. राजस्थानमध्ये चुकीच्या ठिकाणी खंडपीठ देण्यात आले होते. तेथील कामकाजच संपल्याने खंडपीठाचा गाशा गुंडाळण्यात आला आहे.’