पौड - संत तुकाराम सहकारी साखर कारखान्याच्या पंचवार्षिक निवडणुकीत मावळ तालुक्यातील सोमाटणे-पवनानगर गटातील तिन्ही उमेदवार बिनविरोध निवडून आले आहेत, तर उर्वरित १८ जागांसाठी २९ उमेदवार रिंगणात आहेत. माजी खासदार अशोक मोहोळ यांचे पुत्र संग्राम मोहोळ यांनी पौड-पिरंगुट गटात बंडखोरी केली आहे. तथापि उपमुख्यमंत्री अजित पवार यांनी सर्वपक्षीय बैठक घेऊन सर्वानुमते पॅनेलच्या उमेदवारांची नावे जाहीर केली. या पॅनेलमध्ये नव्या चेहऱ्यांना संधी देण्यात आली आहे.
मंगळवारी (ता. ४) पक्षश्रेष्ठींच्या सांगण्यावरून काहींनी आपले उमेदवारी अर्ज माघारी घेतले, तर काहींनी स्वेच्छेने माघार घेतली. पौड- पिरंगुट गटात नवले यांच्या पॅनेलमधून दिलीप दगडे, अंकुश उभे, महादेव दुडे यांना उमेदवारी देण्यात आली. मात्र, या गटात माजी खासदार अशोक मोहोळ यांचे पुत्र संग्राम यांनी बंड पुकारत निवडणूक रिंगणात उडी घेतली आहे. हिंजवडी- ताथवडे गटात विदुरा नवले, बाळासाहेब बावकर, तुकाराम विनोदे या पॅनेलच्या उमेदवारांविरोधात पांडुरंग राक्षे यांनी बंडखोरी केली आहे.
मावळ तालुक्यातील तळेगाव- वडगाव गट - बापूसाहेब भेगडे, ज्ञानेश्वर दाभाडे, शिवाजी पवार या पॅनेलच्या उमेदवारांविरोधात बाळासाहेब नेवाळे, पंढरीनाथ ढोरे, तुकाराम नाणेकर यांनी बंडाचे निशाण फुंकले आहे, तर सोमाटणे- पवनानगर गट - नरेंद्र ठाकर, सुभाष राक्षे, श्यामराव राक्षे हे बिनविरोध निवडून आले आहेत. खेड- शिरूर- हवेली गट - प्रवीण काळजे, मधुकर भोंडवे, दिनेश मोहिते, अनिल लोखंडे हे नवले यांच्या पॅनेलचे उमेदवार असून, अरुण लिंभोरे यांनी बंडखोरी केली आहे.
महिला प्रतिनिधींच्या दोन जागांसाठी ताराबाई सोनवणे, शुभांगी गायकवाड, रूपाली दाभाडे या रिंगणात असून, दाभाडे यांनी बंडखोरी केली आहे. भटक्या विमुक्त जाती व जमातीच्या गटात नवले यांच्या पॅनेलचे उमेदवार बाळकृष्ण कोळेकर यांच्या विरोधात शिवाजी कोळेकर, सुरेश जाधव यांनी दंड थोपटले आहे. इतर मागासवर्ग प्रतिनिधींमध्ये पॅनेलचे चेतन भुजबळ यांच्या विरोधात अरुण लिंभोरे हे रिंगणात आहेत. अनुसूचित जाती- जमाती गटात बाळू गायकवाड यांच्या विरोधात सखाराम गायकवाड उभे ठाकले आहेत.
कारखान्याच्या संचालक निवडीबाबत मला किंवा वडिलांना विश्वासात घेतले गेले नाही. त्यामुळे मी कोणत्याही पॅनेलमध्ये न जाता स्वतंत्रपणे निवडणूक लढणार आहे. मतदारांपर्यंत पोचणार असून, ते जो निर्णय देतील तो मला मान्य राहील.
- संग्राम मोहोळ
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates, मराठी ताज्या बातम्या, मराठी ब्रेकिंग न्यूज, मराठी ताज्या घडामोडी. And Live taja batmya on Esakal Mobile App. Download the Esakal Marathi news Channel app for Android and IOS.