पुणे : फुले-शाहू-आंबेडकर यांचे विचार आणि संविधानाचे रक्षण करण्यासाठी राष्ट्रवादी काँग्रेसचे अध्यक्ष शरद पवार यांना पाठिंबा देत असल्याची घोषणा रिपब्लिकन श्रमिक सेनेचे प्रदेशाध्यक्ष महेश शिंदे यांनी मंगळवारी पत्रकार परिषदेत केली. 

शिंदे म्हणाले, "महाराष्ट्रातील दलित, नवबौध्द, मातंग समाज पवारांच्या पाठिशी उभा राहण्यासाठी दलित प्रबोधन अभियान सुरू करणार आहे. राज्यभर दौरे करून विविध दलित संघटनांना अभियानात सामावून घेणार आहोत. अभियानाची सुरूवात 15 नोव्हेंबरला वेल्हा तालुक्‍यापासून होऊन बीड जिल्ह्यात समारोप होणार आहे.'' 

मागासवर्गीय महामंडळांना मिळणारा अपुरा निधी, दलितांवरील वाढते अत्याचार, बेरोजगारीतील वाढ, दलितांसाठी नवीन योजनेचा अभाव यांचा दाखला देत शिंदे यांनी राज्यातील भाजप सरकारवर निशाणा साधला. महाराष्ट्राला या संकटातून बाहेर काढण्यासाठी एकसंघ दलित समाजाने पवारांच्या पाठिशी उभे राहण्याची गरज त्यांनी व्यक्त केली.