केडगाव : चौफुला ( ता. दौंड ) येथील ऋत्विक पराग कुंभार ( वय ५ ) याने लिंबो स्केटिंग मध्ये विक्रम केल्याची माहिती पंच विशाल देसाई यांनी दिली. केडगावच्या ग्रेट स्पोर्ट्स ॲकॅडमीत कुंभार हा स्केटिंगचे धडे घेत असून तो शारदा सदन शाळेत बालवाडीत शिकत आहे. लिंबो स्केटिंग म्हणजे स्केटिंग वरती स्ट्रेच करत पुढे जाणे. ऋत्विकने ७ क्रेटा ( मोटार ) गाड्या व ७ ज्वलंत लोखंडी पाईप ( फायर बार ) खालून जमिनी पासून ९ इंचावरून जाऊन ५० मीटर अंतर अवघ्या १९ सेकंदात मध्ये पूर्ण केले. हा या क्षेत्रातील विक्रम ठरला आहे.

ग्लोबल जिनियस रेकॉर्ड या जागतिक रेकॉर्डच्या नोंद करणाऱ्या संस्थेने या विक्रमाची नोंद घेतली आहे. या संस्थेच्या माध्यमातून निरीक्षक म्हणून विशाल देसाई आले होते. देसाई म्हणाले, "ग्रामीण भागात हा खेळ फारसा खेळला जात नाही. अशा रेकॅार्डसाठी आम्ही तीन ट्रायल देत असतो. मात्र ऋत्विकने ट्रायल न घेता पहिल्याच प्रयत्नात हे यश मिळविले आहे. या खेळात शाररिक फिटनेस व मनाच्या एकाग्रतेचा कस लागतो. "

अॅकॅडमीचे समाधान दाणे म्हणाले, "संत सेवा संघाच्या माध्यमातून ग्रेट स्पोर्ट्स अॅकॅडमी ग्रामीण भागातील मुलांना साहसी खेळ शिकवण्याचे काम करते. स्केटिंग हा खेळ ग्रामीण भागात अभावानेच खेळला जातो. अशा खेळात विक्रम होणे ही आमच्यासाठी अभिमानाची बाब आहे. अॅकॅडमी माध्यमातून कराटे, मर्दानी खेळ, रायफल शुटिंग, धनुर्विद्या, स्केटींग शिकवले जाते."ऋत्विकला ग्रेट स्पोर्ट्स अकॅडमी चे समाधान दाणे, गणेश घुगे, यश बारवकर, आकाश कसबे, खुशनंदन सिंग यांनी मार्गदर्शन केले.