Kasba Bypoll Result : कसबा पोटनिवडणुकीत भाजपच्या बालेकिल्ल्याला खिंडार पडले आहे. त्यामुळे महाविकास आघाडीचे नेते आणि कार्यकर्त्यांमध्ये भाजपच्या विजयी घोडदौडीला रोखता येऊ शकते याबद्दलचा आत्मविश्वास वाढला आहे. त्यामुळे आगामी महापालिका निवडणुकीवर या पोटनिवडणुकीचा मोठा परिणाम होणार आहे.  थोड्याच वेळापूर्वी जाहीर झालेल्या याच निर्णयावर आता माजी राज्यसभा खासदार संजय नाना काकडे यांनी भाष्य केलं आहे.

आगामी काळात शहर भाजपमध्ये मोठी उलथापालथ होणार असून भाजपच्या संघटनात्मक ताकदीवर या पराभवाने प्रश्नचिन्ह निर्माण झाले आहे. या सगळ्या परिस्थितीवर संजय काकडे यांनी भाष्य करत भाजपला नक्कीच आता या निकालावर आत्मचिंतन कराव लागेल.

तसेच जो पराभव घडलेला आहे त्या पराभवाची नैतिक जबाबदारी माझी देखील आहे त्यामुळेच मी उपमुख्यमंत्री देवेंद्र फडणवीस यांना मेसेज करून दिलगिरी व्यक्त करून जी काही कारवाई करायची असेल ती माझ्यावर करू शकता, अशा प्रकारचा संदेश पाठवला असल्याचे देखील यावेळी संजय काकडे यांनी सांगितले.

भाजपचा बालेकिल्ला असलेल्या कसबा पेठ मतदारसंघामध्ये काँग्रेस उमेदवार रवींद्र धंगेकर यांचा दणदणीत विजय झाला आहे. धंगेकरांना ७२ हजार ५९९ तर भाजप उमेदवार हेमंत रासने यांना ६१ हजार ७७१ मतं मिळाली आहेत. साधारण १० हजार ८०० मतांनी धंगेकर विजयी झाले आहेत.