पुणे : सरहद संस्थेच्या वतीने ‘दुसरा सरहद जम्मू आणि काश्मीर आंतरराष्ट्रीय चित्रपट महोत्सव’ आयोजित करण्यात आला आहे. हा महोत्सव पुण्यात ६ ते १० जानेवारी २०२४ दरम्यान होणार आहे. यंदा ‘महाराष्ट्र काश्मीर’ ही महोत्सवाची संकल्पना असणार आहे, अशी माहिती सरहद संस्थेचे अध्यक्ष संजय नहार यांनी पत्रकार परिषदेत दिली.

यंदा होणाऱ्या पाच दिवसीय महोत्सवाचे उद्‌घाटन नवी पेठेतील एस. एम. जोशी सभागृहात सहा जानेवारी रोजी होणार आहे. या महोत्सवातील चित्रपट राष्ट्रीय चित्रपट संग्रहालयात दाखविले जाणार आहेत. महोत्सवाचा समारोप १० जानेवारी रोजी होणार आहे. जम्मू-काश्मीर आणि महाराष्ट्रातील निर्मात्यांनी निर्माण केलेल्या, दिग्दर्शित केलेल्या अथवा भूमिका असलेल्या आणि ३१ डिसेंबर २०२० नंतर बनविण्यात आलेल्या ‘फिल्म’ महोत्सवासाठी पात्र ठरणार आहेत.

स्पर्धेत महाराष्ट्रातील ४५ मिनिटांपर्यंतची फिल्म, लघुपट यांनाही सहभागी होता येणार आहे, अशी माहिती चित्रपट महोत्सव संचालक मुश्ताक अली, अहमद खान, डॉ. शैलेश पगारिया, चित्रपट निर्माते नीलेश नवलाखा, युवराज शहा यांनी पत्रकार परिषदेत दिली. या महोत्सवात सहभागी होण्यासाठी ३० नोव्हेंबर २०२३ ही अंतिम तारीख असून अधिक माहितीसाठी ‘www.jakiff.com’ या संकेतस्थळाला भेट द्यावी, असे आवाहन संयोजकांनी केले आहे.