पुणे ः जिल्हा (ग्रामीण) पोलिसांच्या स्थानिक गुन्हे अन्वेषण शाखेने पुणे-सोलापूर महामार्गावरील पाटस टोलनाक्यावरील एका सुरक्षा रक्षकास गावठी कट्टा व तलवारीसह शुक्रवारी (ता. १६) मध्यरात्री जेरबंद केले आहे. धनाजी मारुती माकर (वय ४४ वर्षे, रा. पडवी, गायकवाड वस्ती, ता. दौंड) हे त्या जेरबंद केलेल्या सुरक्षा रक्षकाचे नाव आहे. या घटनेमुळे पाटस टोलनाक्यावरील सुरक्षा यंत्रणा संशयाच्या भोवऱ्यात सापडली आहे. स्थानिक गुन्हे अन्वेषण शाखेचे प्रमुख पोलिस निरीक्षक पद्माकर घनवट यांनी दिलेल्या माहितीनुसार, पाटस टोलनाक्यावरील सुरक्षा रक्षक गावठी कट्टा व तलवारीसह संशयास्पदरित्या फिरत असल्याची माहिती पोलिसांना मिळाली होती. या माहितीच्या आधारे सहायक पोलिस निरीक्षक सचिन काळे, हवालदार महेश गायकवाड, निलेश कदम, सचिन गायकवाड, सुभाष राऊत, पोलिस नाईक गुरु गायकवाड, मुकुंद कदम यांनी पाटस टोलनाका परिसरात शुक्रवारी रात्री सापळा रचला होता.

शुक्रवारी मध्यरात्रीच्या सुमारास धनाजी माकर हा बुलेटवरुन टोलनाक्यावर आला होता. यावेळी पोलिसांनी त्याला ताब्यात घेतले. याबाबत पोलिसांनी धनाजीकडे अधिक चौकशी केली असता, धनाजीकडे १ गावठी कट्टा, ३ जिवंत काडतुसे, १ तलवार, १ बुलेट मोटरसायकल व मोबाइल असा १,७०,४००/- (एक लाख सत्तर हजार चारशे रुपयांचा) मुद्देमाल आढळून आला. या प्रकरणाचा पुढील तपास पोलिस निरीक्षक भाऊसाहेब पाटील करत आहेत.

सुरक्षा यंत्रणा संशयाच्या भोवऱ्यात...

पुणे-सोलापूर महामार्गावरील पाटस टोलनाका सुरु झाल्यापासूनच, टोलनाक्यावर वाहनांच्या लागलेल्या लांबच लांब रांगा, सुरक्षा यंत्रणा व वाहन चालकांमध्ये होणारी भांडणे, सुरक्षा रक्षकांकडून दादागिरी ही बाब नित्याचीच बनलेली आहे. यापूर्वीही या टोलनाक्यावर अनेक वेळा सुरक्षा रक्षकांकडून अनेक प्रवाशांना मारहाण केल्याचे गुन्हे यवत पोलिस ठाण्यात दाखल आहेत. मात्र, सुरक्षा रक्षकाकडे थेट गावठी कट्टा व तलवारच सापडल्याने पाटस टोलनाक्यावरील सुरक्षा यंत्रणा संशयाच्या भोवऱ्यात सापडली आहे.