पुणे : शिवसेनेसोबत युती केल्यानंतर वंचित बहुजन आघाडीचे नेते प्रकाश आंबेडकर आता चांगलेच आक्रमक झाल्याचं दिसून येत आहे. पुढील वर्षी होणाऱ्या लोकसभा निवडणुकीच्या पार्श्वभूमीवर त्यांनी मोठं विधान केलं आहे.

पंतप्रधान नरेंद्र मोदी आणि गृहंमत्री अमित शहा यांना मी तुरुंगात टाकल्याशिवाय राहणार नाही, असं खळबळजनक विधान त्यांनी केलं आहे. पुण्यात ते बोलत होते. (Sensational statement of Prakash Ambedkar on PM Modi)

आंबेडकर म्हणाले, भाजपवाले म्हणतात की, आम्ही २०२४ मध्ये परत येऊ, मी म्हणतो २०२९ मध्येही याल कारण आम्हा सगळ्यांना तुम्ही तुरुंगात टाकणार तर तुम्हाला विरोध करणार कोण? पण २०२४ मध्ये भाजप आणि आरएसएसचं सरकार येऊ देऊ नका. मी नरेंद्र मोदी आणि अमित शहा यांना आत टाकल्याशिवाय राहणार नाही.

सत्ता टिकवण्यासाठी भाजपनं एक कोणती चांगली गोष्ट केली आहे ते सांगावं. त्यांचं हिंदुत्व इथल्या मुस्लिम आणि ख्रिश्चनांबद्दल बोलणं असो. उलट मी नरेंद्र मोदींना विचारतो की भाजपत मोदींनंतर दुसरा पंतप्रधान कोण आहे? एकही माणूस आपल्या नजरेसमोर नाही जो देशाचं नेतृत्व करु शकतो. काँग्रेसमध्ये, राष्ट्रवादीत, दक्षिणेतील आणि उत्तर भारतातील राज्यातही हीच परिस्थितीत आहे. एक ही व्यक्ती सध्या या राज्यांमध्ये राहिली नाही की ती राज्याच्या बाहेर जाऊन नेतृत्व करू शकते. ED, सीबीआय, आयबीचा लोकांना धाक आहे, म्हणून सगळे लोकं त्यांना मुजरा करतात, हाथ जोडतात.

तुम्ही त्यांना दोनदा पंतप्रधान केलं. पण आता मोदींच्या मनात भीती आहे की, २००४ मध्ये त्यांचं चारित्र्य लोकांसमोर येऊ नये, म्हणून त्यांच्याकडून बीबीसीचा माहितीपट दाखवणाऱ्यांना अटक केली जात आहे. ही फिल्म दाखवली तर आपली सत्ता जाईल याची त्यांना भीती आहे, म्हणून ती बॅन करण्यात आली आहे.