मार्केट यार्ड (पुणे) : देशात खाद्यतेलाची दरवर्षी मोठ्या प्रमाणात आयात केली जाते. परंतु, यावर्षी लॉकडाऊनमुळे पन्नास टक्क्यांनी आयात घटली आहे. त्यामुळे सध्या मागणी अधिक आणि आयात कमी अशी परिस्थिती निर्माण झाली आहे. त्याचाच परिणाम म्हणून शहरासह राज्यात विविध प्रकारच्या खाद्यतेलाचा तुटवडा निर्माण झाला आहे. घाऊक आणि किरकोळ बाजारात खाद्यतेलाच्या भावात लक्षणीय वाढ झाली आहे. 

ताज्या बातम्यांसाठी डाऊनलोड करा ई-सकाळचे ऍप 

पुण्याच्या बातम्या वाचण्यासाठी येथे  क्लिक करा

तुटवड्यामुळे पाम तेलाच्या डब्यामागे 100 रूपयांची वाढ झाली आहे. सूर्यफुलाच्या तेलाच्या डब्याच्या दरात 50 रूपये, तर सोयाबीन तेलाच्या दरात 30 रूपयांनी वाढ झाली आहे. किरकोळ बाजारातही किलोच्या दरात 5 ते 10 रूपयांची वाढ झाली आहे. ही वाढ आणखी काही काळ कायम राहणार असल्याची माहिती व्यापारी रायकुमार नहार यांनी दिली.

खबरदार ! सोशल मीडियावर चुकीचे मेसेज व्हायरल करणाऱ्यांसाठी जिल्हाधिकाऱ्यांचा...

नहार म्हणाले, कोरोनामुळे वाहतूक बंद आहे. त्यामुळे आणखी दोन महिने सर्व प्रकारच्या तेलाचा काही अंशी तुटवडा जाणवणार आहे. शहरातील हॉटेल्स, खानावळी, विविध प्रकारच्या खाद्यपदार्थ विक्रेत्यांकडून पाम तेलाला मागणी असते. तर घरगुती ग्राहकांकडून सूर्यफुल आणि शेंगदाणा तेलाला मागणी असते.

कोरोनामुक्त बारामतीत पुन्हा कोरोनाची एन्ट्री; आयटी अभियंत्यास कोरोनाची लागण

'या' देशातून होते तेलाची आयात

इंडोनेशिया, मलेशिया, अर्जिटिना आणि युक्रेन या देशातून खाद्यतेलाची आयात होते. 

•  देशात दर वर्षी एकूण मागणीच्या सुमारे 70 टक्के खाद्यतेलाची आयात
• देशात मागणीच्या 30 टक्के खाद्यतेलाची निर्मिती
• मे 2019 मध्ये देशात 8 लाख टन तेलाची आयात
• मे 2020 मध्ये कोरोनामुळे 4 लाख टनच तेलाची आयात
• आयातीचे प्रमाण तब्बल 50 टक्क्यांनी घटले
• लॉकडाऊनमुळे राज्यातील तेल निर्मिती करणारे कारखाने अद्याप बंद 
• या सर्वांच्या परिणामामुळे मागील काही महिन्यांपासून खाद्यतेलाचा काही अंशी तुटवडा

घाऊक व किरकोळ बाजारातील तेलाचे दर
तेल घाऊक (15 लि.) किरकोळ (किलोचा दर)
पाम 1310 (80)
सोयाबीन 1300-1470 (88)
सूर्यफुल 1440-1550 (97-107)
शेंगदाणा 2100 (156)