कोळ्यात संत घाडगेनाथ रथोत्सव उत्साहात

‘बोला पुंडलिका..’च्या जयघोषाने वातावरण भक्तिमय; भाविकांची गर्दी

कोळे, ता. २९ : कऱ्हाड- पाटण तालुक्यातील असंख्य भाविकांचे श्रद्धास्थान असलेल्या येथील श्री संत घाडगेनाथ महाराज वार्षिक यात्रेत आज ‘श्रीं’चा रथोत्सव उत्साहात झाला. ‘बोला पुंडलिका वरदे..’च्या जयघोषाने वातावरण भक्तिमय बनले. ‘श्रीं’च्या दर्शनासाठी भाविकांची गर्दी झाली आहे.

येथील श्री संत घाडगेनाथ महाराज वार्षिक यात्रेचे कऱ्हाड- पाटण तालुक्यातील भाविकांत महत्त्व आहे. यात्रेकरू मोठ्या संख्येने यात्रेसाठी हजेरी लावतात. यात्रा समिती, ग्रामपंचायत व ग्रामस्थांकडून यात्रेचे नियोजन हाेते. विविध धार्मिकसह मनोरंजन कार्यक्रमाचे आयोजन केले आहे. तेथील भुईकोट मैदानात यात्रा भरली आहे. यात्रास्थळावर मेवा-मिठाईची दुकाने आहेत. आज जया एकादशीनिमित्त ‘श्रीं’च्या जयघोषात घाडगेनाथ महाराज रथाची सवाद्य मिरवणूक काढण्यात आली. महिलांची संख्या लक्षणीय हाेती. कुणी नारळाचे तोरण, कुणी नोटांच्या माळा अर्पण केल्या. अग्रभागी बँड पथक हाेते. त्यानंतर मानाचे अश्व, श्री विठुरायाची पालखी, त्यानंतर घाडगेनाथाचा मुख्य रथ व ग्रामस्थ, भाविक असे मिरवणुकीचे स्वरूप होते. आबालवृद्धांनी रथ ओढून श्रद्धा जपली. श्री घाडगेनाथ मंदिरापासून रथ मिरवणुकीला सकाळी प्रारंभ झाला. मुख्य बाजारपेठेतून बसस्थानक परिसर व सायंकाळी यात्रास्थळावर फिरून पुन्हा मुख्य मंदिराजवळ रथाची सांगता झाली. तत्पूर्वी मंदिरात वसंत पंचमीनिमीत्त भंडारा झाला. सायंकाळी फुले टाकण्याचा कार्यक्रम झाला.
........
चौकट
..........
उद्या कुस्ती मैदान...

उद्या (शुक्रवार) सकाळी महाराष्ट्र केसरी श्वास स्पर्धा, सायंकाळी कोळे प्रिमीयर लीग क्रिकेट स्पर्धा, तर शनिवारी (ता. ३१) मोरया कुस्ती मैदानाचे आयोजन केले आहे. घाडगेनाथ विद्यालयाच्या प्रांगणात मैदानाचे ठिकाण आहे.
..................................

B02165
कोळे ः श्री संत घाडगेनाथ महाराज यात्रेच्या मुख्य दिवशी काढण्यात आलेला रथाेत्सव. (विलास खबाले ः सकाळ छायाचित्रसेवा)
-------------------