खडकवासला : कोरोनाचा संसर्ग पुन्हा अचानक वाढल्याने राज्य सरकारने अनेक निर्बंध केले आहेत. पर्यटन ठिकाणी गर्दी होत असल्याने पर्यटन स्थळ, गड किल्ले पर्यटकांसाठी बंदी घातलं आहे. त्या धोरणानुसार सिंहगड देखील पर्यटकांच्यासाठी बंद केल्याची माहिती वन विभागाने दिली.(corona and tourists update)

शहर व जिल्ह्यातील कोरोनाची रुग्णसंख्या वाढली आहे. त्याचा संसर्ग मोठ्या प्रमाणात होत आहे. या पार्श्वभूमीवर खबरदारी म्हणून राज्य सरकारने काही पावले उचलली आहेत. नागरीक, पर्यटकांच्या गर्दीवर नियंत्रण ठेवण्यासाठी काही निबंध सुद्धा लादले आहेत. शाळा, कॉलेज बंद ठेवण्याचा निर्णय घेतला जात आहे.

शहराजवळ असलेल्या सिंहगड व खडकवासला पानशेत व वरसगावच्या परिसरात दररोज हजारो पर्यटक येतात. सुट्टीचे दिवशी तर पर्यटकांची संख्या जवळपास पंधरा- वीस हजार एवढी असते. वनविभागाने राज्य सरकारच्या भूमिकेनुसार बंदी घातली आहे. असे भांबुर्डा चे वन परिक्षेत्र अधिकारी प्रदीप संकपाळ यांनी सांगितले.

सिंहगडावर आतकरवाडीतून पायवाटेने व्यायामासाठी जाणाऱ्या नागरिकांनी जमावबंदीच्या नियमांचे पालन करावे. यात एकावेळी पाच पेक्षा जास्त जणांनी एकत्र जाऊ नये. असे आवाहन ही संकपाळ यांनी केलेले आहे.