कात्रज : कात्रज-कोंढवा रस्त्यावरील श्रीनिवास संकुल गृहरचना सोसायटीमध्ये सौरऊर्जा निर्मीती प्रकल्प साकारण्यात येणार आहे. कात्रज-कोंढवा रस्ता परिसरातील हा पहिलाच प्रकल्प असल्याने याबाबत नागरिकांमध्ये कुतूहल आहे. प्रकल्पासाठी एकूण २३ लाख रुपयांचा खर्च येणार असून या प्रकल्पाच्या माध्यमांतून सोसायटीची वार्षिक दहा लाख रुपयांची बचत होणार आहे.

हा प्रकल्प ४४ किलोवॅट विजनिर्मीतीचा असून या संस्थेची गरज ही ४० किलोवॅट विजेची आहे. या गृहरचना संस्थेत एकूण १४० सदनिका आहेत. एकत्रित जागेसाठी आणि पाण्याची मोटार आदींसाठी लागणाऱ्या विजेची गरज या माध्यमांतून भागविण्यात येणार आहे. या कामाची निविदा देण्यात आलेल्या कंपनीकडून ९० टक्के विजबिल बचतीची हमी घेतली आहे.

सद्स्थितीत दरमहा संस्थेला ९५ हजार रुपयांचे विजबिल येत असून हे कमी होऊन ९० टक्क्यांपर्यंत बचत होणार असल्याचे या गृहरचना संस्थेच्या संचालक मंडळाकडून सांगण्यात आले आहे. या प्रकल्पाचे भूमीपूजन नुकतेच माजी आमदार योगेश टिळेकर यांच्या हस्ते करण्यात आले. यावेळी प्रभाकर कदम, संतोष धुमाळ, अशोक नहार, अध्यक्ष मंगेश भगत यांच्यासह सोसायचीचे पदाधिकारी आणि सदस्य उपस्थित होते.

अशा प्रकारच्या प्रकल्पांसाठी बँकानी गृहनिर्माण सोसायट्यांना अर्थिक सहाय्य गरजेचे आहे. मात्र, त्या अनुषंगाने कोणतीही बँक सहाय्य करत नाही. किमान सहकारी बंँका किंवा राष्ट्रीयकृत बँकांनी ज्या संस्थांचे कन्व्हेन्स डीडी झाले आहे त्यांना किंवा ज्या बँकेत संस्थेचे खाते आहे त्यांना कागदपत्रांची तपासणी करुन अर्थिक सहाय्य करणे गरजेजे आहे.

अशा प्रकारच्या प्रकल्पांसाठी बँकानी अर्थिक सहाय्य केल्यास अनेक सोसायच्या असे प्रकल्प राबविण्यासाठी पुढे येतील. - मंगेश भगत, अध्यक्ष, श्रिनिवास संकुल गृहरचना संस्था, कात्रज-कोंढवा रस्ता