खडकी बाजार(पुणे):  पुणे मुंबई मार्ग वाकडेवाडी व्होडाफोन कार्यालयाजवळ असलेले सात ते आठ स्टॉल घोले रोड क्षेत्रीय कार्यालय अतिक्रमण विभागाने धडक कारवाई करून कुलूप सील केले. स्टॉल परवाना ज्यांच्या नावाने आहे त्यांनी हे स्टॉल भाडेतत्वावर दिले असल्याचे लक्षात आल्यानंतर महापालिकेच्या अतिक्रमण विभागाने कारवाई केली असल्याची माहिती अतिक्रमण अधिकाऱ्यांनी दिली आहे.            

पुणे मुंबई मार्गावर रस्त्याच्या दोन्ही बाजूला महापालिकेने व्यावसायिक स्टॉलला परवाने दिले आहेत, मात्र ज्यांना हे परवाने दिले गेले त्यांनी स्वतः व्यवसाय करण्याची अट महापालिकेने परवाना देताना घातली असून देखील याठिकाणी मोठ्या प्रमाणात स्टॉल भाडेतत्वावर देण्याचे धाडस काही स्टॉल धारकांनी केले. महापालिकेच्या लक्षात येताच आपला फौजफाटा घेऊन पुणे-मुंबई मार्गावर सोमवारी ( ता.५) संध्याकाळी चार वाजण्याच्या दरम्यान पुणे महापालिका उपायुक्त माधव जगताप यांच्या मार्गदर्शनाखाली नारायण साबळे व कर्मचाऱ्यांनी व्होडाफोन कार्यालयाजवळ स्टॉल धारकांनी कागदपत्र तपासणी केली, तेव्हा या परिसरातील फक्त एकच स्टॉल धारक स्वतः व्यवसाय करताना आढळला बाकीच्या सर्व स्टॉल धारकांनी स्टॉल भाड्याने दिले असल्याचे समोर आले. तेव्हा  अधिकाऱ्यांनी त्वरित स्टॉल बंद करून कुलूप सील केले. यापुढेही पुणे शहरात सर्वत्र कारवाई सुरू असणार असल्याची माहिती अधिकाऱ्यांनी दिली.  

 ताज्या बातम्यांसाठी डाऊनलोड करा ई-सकाळचे ऍप

- पुण्याच्या बातम्या वाचण्यासाठी येथे ► क्लिक करा

                   
''पुणे शहरात महापालिकेच्यावतीने गरजू व्यक्तींना कागदपत्रांची पूर्तता करून व्यवसाय करण्यासठी स्टॉल परवाने दिले आहेत, मात्र व्यवसाय स्वतः करावा अशी अट असूनही पुण्यात बऱ्याच ठिकाणी स्टॉल भाडेतत्वावर दिले असलयाची माहिती मिळत आहे. त्यामुळे आम्ही वाकडेवाडी येथे समक्ष पाहणी केली असता जास्तीत जास्त स्टॉल भाड्याने दिले असल्याचे समोर आले त्यामुळे येथील काही स्टॉल सील करण्यात आले आहेत. यापुढेही बेकायदेशीर कृत्य करणाऱ्या स्टॉल धारकांवर कारवाई करण्यात येईल.'' 

- माधव जगताप,  उपायुक्त, घोलेरोड क्षेत्रीय अतिक्रमण विभाग