पुणे : राज्यातील काना-कोपऱ्यातील विद्यार्थ्यांना टीव्हीद्वारे शिक्षणातील धडे देता यावेत, यासाठी राज्य सरकार गेल्या काही महिन्यांपासून प्रयत्नशील आहे. स्वतंत्र शैक्षणिक वाहिनीचा प्रस्ताव राज्याने लॉकडाऊनपूर्वीच केंद्र सरकारकडे पाठविला होता, परंतु प्रस्ताव मंजूरीच्या वाटेवर असतानाच लॉकडाऊन जाहीर झाला आणि स्वतंत्र शैक्षणिक वाहिनी सुरू होण्यापूर्वीच 'लॉक' झाली.

- 'कार्यशाळाच नाही, तर विद्यार्थ्यांना शिकवायचे कसे?' पुणे विद्यापीठातील प्राध्यापक संभ्रमात!

राज्य सरकारच्या शिक्षण विभागातर्फे स्वतंत्र शैक्षणिक वाहिनी सुरु करण्याचा प्रस्ताव केंद्र सरकारच्या माहिती व प्रसारण मंत्रालयाला देण्यात आला होता. या प्रस्तावाप्रमाणे शैक्षणिक वाहिनी सुरू करण्यासाठी पूर्व तयारी देखील करण्यात आली होती. त्यासाठी आवश्यक आशय, तांत्रिक बाबींची तयारी करण्यात आली होती. परंतु लॉकडाऊन जाहीर झाल्यामुळे गेल्या तीन महिन्यापासून हा प्रस्ताव केंद्र सरकारच्या दफ्तरी फाइल बंद आहे. 

- घाबरु नका; तुमच्यासाठी इथे नोकरी उपलब्ध आहे; राज्य शासनाचा उपक्रम

राज्य शैक्षणिक संशोधन आणि प्रशिक्षण परिषदेचे संचालक दिनकर पाटील म्हणाले," कोविड-१९ विषाणूचा संसर्ग वाढण्यापूर्वी केंद्र सरकारकडे स्वतंत्र शैक्षणिक वाहिनीची मागणी करणारा प्रस्ताव पाठविण्यात आला होता. प्रस्ताव अंतिम मंजुरीच्या प्रतिक्षेत होता आणि लॉकडाऊन जाहीर झाले. या प्रस्तावाप्रमाणे केवळ शिक्षणासाठी नियमितपणे चोवीस तास शैक्षणिक कार्यक्रम अशा स्वतंत्र वाहिनीचे नियोजन करण्यात आले आहे. यात सर्व वयोगटातील (बारावीपर्यंत) विद्यार्थ्यांसाठी ही वाहिनी असणार आहे. आत्ताही आपण या स्वतंत्र वाहिनीच्या मागणीसाठी पाठपुरावा करत आहोत."

- ताज्या बातम्यांसाठी डाऊनलोड करा ई-सकाळचे ऍप 

- पुण्याच्या बातम्या वाचण्यासाठी येथे  क्लिक करा