बारामती : शहरातील विविध लॉजवर अल्पवयीन मुलांचे प्रमाण वाढल्याच्या माहितीवरुन पोलिसांनी आज अचानकच पंधराहून अधिक लॉजची सरप्राईज तपासणी केली. अतिरिक्त पोलिस अधीक्षक आनंद भोईटे, उपविभागीय पोलिस अधिकारी गणेश इंगळे, पोलिस निरिक्षक सुनील महाडिक व प्रभाकर मोरे यांच्या पथकाने स्वताः ही तपासणी केली.

या तपासणीमध्ये काही लॉजवर महाविद्यालयीन युवक युवती सापडल्यानंतर त्यांना समज देत पोलिसांनी सोडून दिले. शहर व एमआयडीसी परिसरातील लॉजची तपासणी केल्यानंतर काही त्रुटी आढळून आल्या असून पोलिसांनी आता लॉजचालकांवर कारवाईचा इशारा दिला आहे. आजच्या तपासणीदरम्यान महिला पोलिसांचाही समावेश करण्यात आला होता. महाविद्यालयीन युवक युवतींसोबत काही प्रेमी युगुलेही या तपासणीत सापडली.

दरम्यान अल्पवयीन मुलांना पैसे घेऊन रुम दिल्याचा प्रकार आढळल्यास लॉजचालकांवर कारवाई केली जाईल, असा इशारा आनंद भोईटे यांनी दिला आहे. दरम्यान नगरपालिकेच्या मुख्याधिका-यांनाही इमारतीचे बांधकाम, त्याच्या तांत्रिक बाबी तपासण्याच्या सूचना त्यांनी दिल्या आहेत.