किरकटवाडी (पुणे) : खडकवासला बायपास रस्त्याचे काम कित्येक दिवस रखडल्यानंतर तात्पुरता पर्याय म्हणून खडकवासला ग्रामपंचायतीने सिमेंट पाईप व मुरूम टाकून नागरिकांच्या सोयीसाठी तयार केलेला पूल काल ( दि. 5 सप्टेंबर) झालेल्या जोरदार पावसामुळे वाहून गेला आहे. रस्त्याच्या कामाला विलंब लावणाऱ्या ठेकेदाराला पाठीशी घालणाऱ्या सार्वजनिक बांधकाम विभागातील अधिकाऱ्यांचे फोन मात्र नॉट रिचेबल येत आहेत.
         

पत्रकारांच्या विमा संरक्षणाबाबत उपमुख्यमंत्र्यांनी दिले संकेत; अधिवेशनात मांडणार मुद्दा

मागील वर्षी 25 सप्टेंबर 2019 रोजी खडकवासला व आजूबाजूच्या परिसरात झालेल्या जोरदार पावसाने खडकवासला बायपास रस्त्यावरील पुलाचा मातीचा भराव वाहून गेला होता. पूल व्यवस्थित असल्याने त्यावरून वाहनांची ये-जा सुरू होती. बायपास रस्त्याचे काम सुरू केल्यानंतर ठेकेदाराने जुना पूल पूर्णपणे तोडला. पुल तोडल्यानंतर लवकर काम पूर्ण होईल अशी नागरिकांची अपेक्षा होती; परंतु वर्ष होत आले तरी रस्त्यासह पुलाचेही काम रखडलेले‌ आहे.

- ताज्या बातम्यांसाठी डाऊनलोड करा ई-सकाळचे ऍप

 ठेकेदाराने पुल तोडल्यानंतर नागरिकांची मोठी गैरसोय होऊ लागली. खडकवासला ग्रामपंचायतीने नागरिकांच्या सोयीसाठी तात्पुरता उपाय म्हणून ओढ्यामध्ये सिमेंट पाईप टाकले व त्यावर मुरूम टाकून तात्पुरता पर्यायी रस्ता सुरू केला. मात्र काल झालेल्या जोरदार पावसामुळे तयार केलेला पर्यायी रस्ता पुन्हा वाहून गेला आहे. बायपास रस्त्यावरून ये-जा करणाऱ्या नागरिकांची यामुळे मोठ्या प्रमाणात गैरसोय होत आहे.

- पुण्याच्या बातम्या वाचण्यासाठी येथे ► क्लिक करा

लेखी आश्वासनाचे झाले काय?
मुख्य रस्त्यासह खडकवासला बायपास रस्त्याचे काम रखडल्यानंतर खडकवासला ग्रामस्थांनी 18 जानेवारी 2020 रोजी 'रास्ता रोको' आंदोलनाचा इशारा दिला होता. त्यावेळी रोडवेज सोल्यूशन या रस्त्याचे काम करणाऱ्या कंपनीच्या वतीने खडकवासला ग्रामस्थांना रस्त्याचे काम पूर्ण होईपर्यंत मशिनरी हलवणार नाही असे लेखी आश्वासन दिले होते; मात्र तरीदेखील रस्त्याचे काम झाले नाही व एकेक करून कामासाठी आलेल्या मशिनरीही गायब झाल्या. यावरून संबंधित ठेकेदार सार्वजनिक बांधकाम विभागासह स्थानिक नागरिकांचीही फसवणूक करत असल्याचे दिसून येत आहे. सार्वजनिक बांधकाम विभागाचे शाखा अभियंता ज्ञानेश्वर राठोड व अतिरिक्त अभियंता अश्विनी भुजबळ यांच्याशी या वाहून गेलेल्या पुलाबाबत व रखडलेल्या कामाबाबत संपर्क करण्याचा प्रयत्न केला परंतु त्यांचा फोन नॉट रिचेबल येत आहे.

"तात्पुरता पूल वाहून गेल्यानंतर रात्रीपासूनच अधिकार्‍यांशी संपर्क करण्याचा प्रयत्न करत आहे; परंतु अधिकारी फोनला उत्तर देत नाहीत. रात्रीचा अपघात होऊ नये म्हणून तातडीने संबंधित ठेकेदाराकडून पुलाच्या दोन्ही बाजूला बॅरिकेड्स लावून घेतले. रस्त्याचे काम रखडल्यामुळे नागरिकांमध्ये खूप संतापाची भावना आहे. लवकरच तीव्र स्वरूपात आंदोलन करण्यात येणार आहे." सौरभ मते, सरपंच , खडकवासला.