पुणे : शहरातील पथ विक्रेत्यांना व्यवसाय सुरू करण्यासाठी विनातारण दहा हजार रुपयांचे कर्ज उपलब्ध करून देण्यात येणार आहे. पथविक्रेत्यांनी केंद्र सरकारच्या पंतप्रधान पथविक्रेता आत्मनिर्भर निधी योजनेचा लाभ घ्यावा, असे आवाहन जिल्हाधिकारी डॉ. राजेश देशमुख यांनी केले आहे. 

कोरोना संसर्गाच्या पार्श्‍वभूमीवर लॉकडाऊनमुळे पथविक्रेते आणि फेरीवाले यांच्या उपजीविकेवर विपरीत परिणाम झाला आहे. त्यामुळे पथविक्रेत्यांना त्यांचा व्यवसाय पुन्हा सुरू करण्यासाठी खेळत्या भांडवलाचा पतपुरवठा करण्याची आवश्‍यकता आहे. यासाठी केंद्र सरकार पुरस्कृत पंतप्रधान पथविक्रेता आत्मनिर्भर निधी योजनेअंतर्गत पथविक्रेत्यांसाठी पतपुरवठा योजनेची अंमलबजावणी करण्यात येत आहे. दहा हजार रुपयांपर्यंतचे खेळते भांडवली कर्ज उपलब्ध करणे, नियमित परतफेडीसाठी प्रोत्साहन आणि डिजिटल व्यवहारास प्रोत्साहन देणे हा योजनेचा उद्देश आहे. 

- चारित्र्याच्या संशयावरून 'त्याने' पत्नीला पुलावरून नदीत ढकलले; संगमपुलाजवळ घडली घटना​

या योजनेसाठी 24 मार्च 2020 आणि त्यापूर्वी शहरातील पथविक्रेते पात्र असतील. या योजनेत एक वर्षांच्या परतफेड मुदतीसह दहा हजार रुपयापर्यंतचे खेळते भांडवल कर्ज उपलब्ध करून देण्यात येईल. कर्जपुरवठा करणारी बॅंक अथवा संस्था कोणत्याही प्रकारचे तारण घेणार नाही. मुदतीत परतफेड केल्यास पथविक्रेते पुढील खेळते भांडवलाच्या कर्जासाठी पात्र असतील. याबाबत व्याजदर रिझर्व्ह बॅंक ऑफ इंडियाच्या मार्गदर्शक सूचनांनुसार असतील.

- इंदापुरात कोरोनाला प्रतिबंध करण्यासाठी राबविण्यात आला 'हा' अनोखा उपक्रम​

लाभार्थ्यांनी मुदतीत कर्ज परतफेड केल्यास सात टक्के व्याज अनुदान मिळण्यास पात्र असतील. डिजिटल व्यवहार करणाऱ्या विक्रेत्यांना 50 ते 100 रुपये मासिक कॅशबॅक मिळेल. या योजनेसाठी महापालिका आयुक्त, नगरपरिषद आणि नगरपंचायत क्षेत्रासाठी मुख्याधिकारी यांच्या अध्यक्षतेखाली समिती गठीत करण्यात आली आहे. पात्र लाभार्थ्यांनी संबंधित महापालिका, नगरपालिकेत संपर्क साधून आवश्‍यक कागदपत्रांसह अर्ज दाखल करावेत, असे आवाहन जिल्हाधिकारी डॉ. देशमुख यांनी केले आहे.

- पुण्याच्या बातम्या वाचण्यासाठी येथे ► क्लिक करा

(Edited by : Ashish N. Kadam)