पुणे : नाना पेठेतील एका रुग्णालयामध्ये दाखल केलेल्या वृद्ध महिलेवर कोरोनासंबंधी उपचार सुरु असताना वृद्ध महिला रुग्णालयातून निघून गेली. त्यानंतर महिलेचा हडपसर येथून जाणाऱ्या मुठा कालव्यामध्ये रविवारी सकाळी मृतदेह आढळून आला. महिलेने कोरोनाच्या भितीपोटी आत्महत्या केली असण्याची शक्‍यता पोलिसांनी व्यक्त केली आहे.

याप्रकरणी 60 वर्षीय महिलेचा अकस्मात मृत्यु झाल्याची नोंद हडपसर पोलिस ठाण्यात करण्यात आली आहे. समर्थ पोलिस ठाण्यात महिला बेपत्ता झाल्याची तक्रार दाखल करण्यात आली होती.

पोलिसांनी दिलेल्या माहितीनुसार, समर्थ पोलिस घटनास्थळी दाखल झाल्यानंतर कपडे व कुटुंबातील सदस्यांनी सांगितलेल्या वर्णनावरुन महिलेची ओळख पटली. संबंधीत महिला कोरोनाबाधीत झाल्यानंतर तिला गणेश पेठेतील एका रुग्णालयात उपचारांसाठी दाखल करण्यात आले होते. त्यानंतर त्या रुग्णालयामध्ये तीन रुग्णांचा मृत्यु झाला. या घटनेमुळे महिला नैराश्‍येत गेली. तिने कुटुंबीयांशी संपर्क साधून तिला दुसऱ्या रुग्णालयात हविण्यास सांगितले होते. त्यानुसार, महिलेची मानसिक स्थिती लक्षात घेऊन कुटुंबीयांनी तिला 6 मे रोजी दुसऱ्या रुग्णालयात उपचारांसाठी दाखल केले होते.दरम्यान, शनिवारी पहाटेच्या सुमारास महिला कोणालाही काही न सांगता तेथून निघून गेली होती.