पुणे : कोरोना रुग्णांच्या पुरेशा सुरक्षिततेचे उपाय न केलेले खासगी कोविड सेंटर बंद केले जाण्याची शक्यता आहे. मात्र, उपचाराच्या सेवा-सुविधा आहेत आणि अत्यवस्थ रुग्णांना वेळेत हॉस्पिटलमध्ये दाखल करण्याची व्यवस्था केलेले सेंटर सुरू राहणार आहेत.

शहरातील काही खासगी कोविड सेंटरने अत्यवस्थ रुग्णांच्या उपचारासाठी हॉस्पिटलशी करार केले नाहीत. त्यामुळे रुग्णांच्या जिवाला धोका होऊ शकतो, अशी वस्तुस्थिती महापालिकेच्या दक्षता समितीचे अध्यक्ष राजेंद्र मुठे यांनी आरोग्य खात्याच्या निदर्शनास आणून दिली आहे. परवानगी दिलेल्या आणि रुग्णांवर उपचार सुरू असलेल्या कोविड सेंटरची पाहणी करण्याचा आदेश महापालिका आयुक्त विक्रम कुमार यांनी आरोग्य खात्याला दिला आहे.

कोरोनाच्या दुसऱ्या लाटेत रुग्ण वाढतानाच संस्था-संघटना आणि वैद्यकीय क्षेत्रांतील तज्ज्ञांनी एकत्र येऊन, कोविड केअर सेंटर सुरू केले आहेत. त्यातून ऑक्सिजन बेड उपलब्ध केले आहेत. परंतु, उपचारासाठी रुग्ण वाढले असतानाही ऑक्सिजन आणि ‘रेमडेसिव्हिर’ इंजेक्शन नसल्याची तक्रारी सेंटर व्यवस्थापनांनी महापालिकेकडे केल्या. काही सेंटरमध्ये तर कोणत्या क्षणी ऑक्सिजन संपवून रुग्णांचे हाल होण्याची भीती होती. अशा सेंटरमधील रुग्णांना इतरत्र हलविण्याची महापालिकेने तयारी केली होती. या पाश्‍‍र्वभूमीवर बहुतांशी सेंटरमध्ये आवश्‍यक सुविधाच नसल्याचे दक्षता समितीच्या निदर्शनास आले आहे.

कोविड सेंटरमध्ये सुविधा हव्यात

• उपचार खर्चाचे दर, त्याची माहिती

• जागा, उपचाराच्या सुविधा तपासणी अहवाल

• पोलिसांची ‘एनओसी’

• सेंटरच्या इमारतीचे ‘स्ट्रक्चरल, फायर ऑडिट,

• डॉक्टरांची पात्रता, त्यांची माहिती

• भाडेतत्त्वावरील जागेचा करार

• मान्यताप्राप्त हॉस्पिटलशी करार

''राज्यातील अन्य शहरांत उपचाराच्या ठिकाणी अपघात घडल्याने काळजी घेतली जात आहे. रुग्ण उपचारासाठी दाखल होण्याचे प्रमाण पाहता, रुग्णांच्या सुरक्षिततेच्या उपायांत कमतरता दिसून आली आहे. अशा कोविड सेंटरमध्ये उपचार नको, अशी शिफारस आहे.''

-राजेंद्र मुठे, अध्यक्ष, दक्षता समिती, महापालिका